An evacuadas mai de dos cents mila personas a causa de l’erupcion del volcan Kelud, dins l’illa de Java, en Indonesia. Al delà del grand nívol de cendre, lo volcan lança de sabla e de ròcas a 15 quilomètres, segon çò que raportava al jornal Jakarta Post lo pòrtavotz de l’Agéncia Nacionala dels Desastres, Sutopo Purwo Nugroho. A l’ora d’ara doas personas son mòrtas a causa del volcan.
 
Kelud, qu’es a l’èst de Java, se considèra qu’es un dels volcans mai perilhoses de tota l’illa pr’amor de la densa populacion que i a als versants de la montanha, amb 36 luòcs abitats dins un rai de 10 quilomètres. Lo pòrtavotz del Ministèri del Transpòrt, Bambang Ervan, a afirmat que los aeropòrts internacionals de Yogyakarta, Solo e Surabaya son barrats a causa del cendre lançat pel volcan.
 
S’agís de la catastròfa mai granda enregistrada per una erupcion de Kelud dempuèi l’an 1568, quand los rius de lava, los nívols de cendre e las ròcas causèron la mòrt d’aperaquí dètz mila personas.
 
Indonesia es sus que que li dison l’Anèl de Fuòc del Pacific, un airal de granda activitat sismica e volcanica, e compren mai de 400 volcans, e qu’entre eles almens 129 rèstan actius e 65 son considerats perilhoses.