A Saucats, meitat vilatge, meitat granda banlèga bordalesa de 2000 abitants dens la Lana de Bordèu, la reforma daus programas escolars s’es hèita coma pertot. Sonque aquí, entre las activitats perpausadas devath la forma de talhèirs periescolars, i a l’occitan. Es l’Ostau Occitan, seccion locau de l’IEO (Institut d’Estudis Occitans) que’n hit la proposicion e met a disposicion l’animator, Dàvid Escarpit. La causa que hèi la diferéncia, es qu’ací n’es pas una òra, son quate òras setmanèiras d’occitan que son perpausadas a tots los escolans.
 
Lo principi es lo sheguent: un jorn, un grop; a cada trimèstre, los escolans càmbian completament, de mòdas qu’a la hèita fin, tots los mainatges o quasi auràn descobèrt la lenga dau país. En tot, pòden estimar que son entre 100 e 120 escolans qu’au cap de l’annada se seràn iniciats a l’occitan, dens la version gascona maritima locau. Una chifra elevada que permet, maugrat que tot lo monde ne vengui pas de tira apassionat d’occitan en un trimèstre, de fidelizar pas mau de joens neolocutors.
 
Que l’occitan sembla plaire, au vist daus permèirs retorns dont receburen l’escòla e la municipalitat. L’adjunt au maire Brunon Clément, candidat a la mairetat per 2014, amic e sostenh de l’occitan, se pòt felicitar de la sua volontat de tornar botar la lenga au còr de la comuna, dab tanben l’existéncia d’un cors per adultes (lo dimars de sèir) e de manifestacions culturaus capvaths las diferentas escadenças au cors de l’annada.
 
Los còishes dau país dau president de Montesquiu —que parlèt occitan abans de parlar francés— semblan ben urós de descobrir tot aqueste panèth de la sua cultura e identitat, de mòdas qu’una quarantena d’entre eths que participèren aus talhèirs d’occitan au purmèir trimèstre ara an ja demandat de s’i tornar au tresesme trimèstre! Una recompensa, la mei bèra, per tots los que chinan coma machatroncas e creden a l’avenir de la lenga en país girondin.
 
 
 
 
Dàvid Escarpit