L’associacion Kerlenn Sten Kidna, qu’ei basada a An Alre (Bretanha), que produsiguèc en 2012 un espleit nau e modèrne entaus que vòlen aprigondir la lor compreneson orau deu breton.
 
Lo projècte, menat per ua còla de benevòls de l’associacion, qu’èra vasut en 2007. Que cauguèc hèra de tribalh, que siá la redaccion de tèxtes, la causida d’actors tà’us legir, lo filmatge, l’elaboracion d’exercicis de 7 tipes per cada tèma (15) e cada nivèu (3), shens desbrombar lo codatge deu DVD eth medish e, solide, la fasa d’ensais de tota mena. Lo filme e lo codatge que hosquèren hisats a professionaus, totun.
 
Ua particularitat d’aqueth DVD ei que i a tres nivèus de dificultat per cada tèma, ei a díser que la medisha istòria ei contada tres vegadas peu medish actor, mes l’istòria qu’ei de mei en mei longa dab de mei en mei de vocabulari entre lo primèr nivèu e lo tresau. Los actors que son locutors joves o mei vielhs deu país de Vannes, hemnas e òmis, qu’emplegan la lenga hens la lor vita vitanta.
 
Aqueth espleit que serà hèra util aus que vòlen comprene miélher lo breton parlat, e lo parlar mielhs tanben. Lo ligam dab la lenga escriuta qu’ei hèit plan, per’mor que los tèxtes se pòden legir hens lo DVD, e que cau legir los tèxtes deus exercicis tanben.
 
Ua vidèo en mei d’ua lenga, e en occitan tanben, que mòstra lo biaish de tribalhar dab aqueth DVD. Lhèu que balharà idèas a autes bretons d’autes parçans e, qui sap, aus occitans o a autes enqüèra!
 
Entà véser la vidèo en occitan e saber mei de causas sus lo DVD Daet eo genin,anatz véser lo sit de l’association Kerlenn Sten Kidna.
 
 
 
 
Patrick Drean