Las violéncias a Kyiiv entre policièrs e manifestants an portat mai de victimas. Ièr de ser èran ja 14 las personas mòrtas, policièrs e civils. Al delà i a qualques ferits per balas: aperaquí 150 manifestants segon l’oposicion e 47 policièrs segon lo govèrn. Mas aqueste bilanç tragic pòt montar, en vesent l’anar dels afrontaments.
 
Aqueste còp las violéncias comencèron quand de milièrs de manifestants trenquèron un cordon de polícia près del Parlament ucraïnés. La polícia voliá empedir lo passatge d’una marcha que revendicava lo restabliment de la constitucion de 2004 e que voliá limitar tornarmai lo poder del president del país Viktor Ianukovych.
 
Los tres partits de l’oposicion anoncièron que volián exigir al Parlament la restitucion de l’anciana constitucion dins la session d’aqueste dimars, mas la majoritat oficialista permetèt pas d’inclure aquel ponch dins l’òrdre del jorn.
 
Lo conflicte comencèt en novembre, quand lo govèrn decidiguèt de signar pas l’acòrdi d’associacion amb l’Union Europèa e quand s’integrèt mai amb Russia. Davant las creissentas manifestacions europeïstas al centre de Kyiiv, ocupat per l’oposicion, la majoritat parlamentària oficialista aprovèt, lo 16 de genièr passat, una seguida de leis per restrénher lo drech de reünion e d’autras libertats civilas. Aquò provoquèt mai de violéncias que causèron sièis mòrts e de centenats de ferits. Per evitar mai de sang, las autoritats e l’oposicion comencèron un procès de negociacions. Lo resultat foguèt la demission del govèrn del primièr ministre, Mykola Azarov, del temps que los manifestants liberèron qualques bastissas publicas qu’avián ocupadas. De mai s’aprovèt una amnestia per totes los manifestants acusats de violéncias per carrièras.
 
Mas tot aquò es pas estat pro per calmar los milièrs de manifestants acampats dins la plaça que nomenan Maidan. Reclaman mai de transparéncia e un país mai dobèrt a l’Union Europèa.