Lo president de la Comission Europèa, José Manuel Durão Barroso, a avertit Ucraïna aqueste dimècres que l’Union Europèa poiriá impausar de mesuras contra los responsables de la violéncia que devasta la capitala e que ja a provocat la mòrt d’almens 25 personas. En un comunicat, Barroso a dich qu’espèra que “los estats membres se pòscan acordar de manièra urgenta” sus las sancions possiblas. De fach, França e Alemanha ja an menaçat lo govèrn de Viktor Ianukovych amb de sancions individualas.

En un comunicat, lo president de la Comission Europèa, José Manuel Durão Barroso, a dich que “i a pas de circonstàncias que pòscan legitimar o justificar” los eveniments de las darrièras 24 oras a la Plaça Maidan (o Plaça de l’Independéncia) de Kyiiv. Segon Barroso, lo govèrn de Ianukovych “a la responsabilitat de garentir la proteccion necessària dels dreches fondamentals e las libertats”. “Demandam a las doas partidas que n’acaben amb la violéncia e qu’inícien un dialòg”, çò a apondut lo portugués, que crei que cal respondre “a las aspiracions democraticas del pòble d’Ucraïna”. 

Barroso a remarcat que l’Union Europèa “a dich clar qu’es preparada per sosténer Ucraïna sus son camin cap a las reformas, la democracia, l’estabilitat e la prosperitat”. “Nòstra ofèrta d’associacion politica e integracion economica rèsta sus la taula, mas es pas l’objectiu final de nòstra cooperacion”, çò a recordat lo president de la Comission Europèa. Foguèt precisament la decision de Ianukovych de s’alonhar de l’UE per se raporchar mai de la Russia de Putin qu’aluquèt los destorbis e las protèstas actualas. 

Lo president de la Comission Europèa, totun, tanben a avertit que “l’UE respondrà a tota deterioracion sus lo terren”. “Esperam que los estats membres se pòscan acordar d’urgéncia sus de mesuras dirigidas contra los responsables de l’us de la fòrça excessiva”, çò a indicat. En la meteissa linha, lo ministre francés Laurent Fabius a dich que se pòt impausar de “sancions individualas”, mentre que son omològ alemand, Frank-Walter Steinmeier, a remarcat que lo “banh de sang” en Ucraïna deu aver una responsa. Precisament França e Alemanha fan un rescontre bilateral aqueste dimècres a París ont poirián debatre sus la question.
 
 
Nuèch de violéncia
 
Los destorbis d’aquesta nuèch a Kyiiv, après de setmanas de calma, an fach almens vint e cinc mòrts, qu’entre eles i a de manifestants e d’agents de polícia. E mai i a de centenats de ferits. Las riòtas comencèron ièr a miègjorn, quand lo govèrn daissèt un relambi fins a cinc oras de l’aprèsmiègjorn per metre fin a las susmautas. Lo deslotjament de la Plaça de l’Independéncia s’acabèt amb d’acipadas fòrça violentas, e fòrça ferits de bala se tròban en estat grèu.

Vaicí d’imatges en dirècte de la plaça:




Lo president ucraïnés, Viktor Ianukovych, aviá ordenat a la polícia qu’a uèch oras del vèspre deslotgèsson la plaça, presa pels opausants dempuèi novembre. Prèviament, las fòrças de seguretat avián avisat los concentrats dins la plaça dels òrdres que tenián e lor avián conselhat se s’enanar abans la carga. Èra un conselh de mal seguir, en tenent compte del clima ostil que viu Ucraïna dempuèi lo tornant pròsovietic de la politica de Ianukovych. A partir de uèch oras del ser, donc, la Plaça de l’Independéncia —o Plaça Maidan, coma se coneis localament— foguèt la scèna d’afrontaments violents, amb d’explosions, de gases lacrimogèns, de coctèls Molotov e tota mena d’engenhs. Se i podiá veire de flamas de granda auçada mentre que los camions policièrs lançavan de rajòlas d’aiga contra los manifestants.

La polícia a rasat una bona partida de l’acampada dels manifestants e de nombrosas tendas de campanha son estadas incendiadas. Los opausants a Ianukovych an anonciat que s’enanarián pas, per pus frapanta que foguèsse la carga policièra.
 
A l’encòp, qualques centenats de manifestants anèron fins al sèti del Partit de las Regions (lo partit al poder, lo de Ianukovych) e i botèron fuòc.

Ianukovych responsabiliza los caps opausants de l’espirala de violéncia de Kyiiv.