Agèr dimèrcles se constituïc en Vielha eth Conselh de Politica Lingüistica der Occitan Aranés, que compde damb ueit membres. Eth sòn caractèr qu'ei paritari entre eth Conselh Generau d'Aran e era Generalitat de Catalonha. Er organisme ei creat en tot seguir era Lei der occitan, aranés en Aran, entà coordinar era promocion e era normalizacion der aranés. Totun, Unitat d'Aran ne critique era manca de consensus, eth baish perfil institucionau e lingüistic, e prepause ua comission de partits aranesi.
Dimèrcles passat se constituïc en Vielha eth Conselh de Politica Lingüistica der Occitan Aranés, que compde damb ueit membres e qu'a un caractèr paritari entre eth Conselh Generau d'Aran e era Generalitat de Catalonha. Era tòca d'aqueth Conselh qu'ei de coordinar es mesures d'impuls e de normalizacion lingüistica der occitan aranés partatjades pes govèrns d'Aran e de Catalonha. Ath delà que deu desplegar contenguts entar estudi, recèrca e promocion dera nòsta lengua, segontes ei previst ena Lei der occitan, aranés en Aran.
Er organisme deu préner en carga era aprovacion des programes annaus e deu establir eth finançament sufisent des politiques lingüistiques entara nòsta lengua. Eth Conselh de Politica Lingüistica der occitan-aranés, a er estatut de ponéncia permanenta e especializada.
Eth Conselh de Politica Lingüistica que deven, alavetz, era airina de cooperacion institucionau basica entà arténher es objectius generaus der Estatut de Catalonha e dera Lei der occitan, aranés en Aran, d'arreconéisher, protegir e promòir er occitan ena sua varietat aranesa en toti es encastres e sectors.
Eth Conselh qu'ei estat creat en tot seguir er acòrd bilaterau entre es govèrns catalan e aranés deth passat 17 de mai. Eth sòn president qu'ei Francesc Xavier Solà, secretari generau de Cultura dera Generalitat de Catalonha, deth temps qu'eth sindic d'Aran, Carlos Barrera, n'ei eth vicepresident.
Er Institut d'Estudis Aranesi, acadèmia dera lengua
Solà, a explicat as mejans de comunicacion qu'ena session constitutiva s’an prenut dus acòrds:
1. Crear ua comission de trabalh paritària, entre eth Departament de Cultura dera Generalitat e eth Conselh Generau d’Aran, entà fixar quin a d'èster eth procès de desvolopament des objectius que mèrque era Lei, entara normalizacion lingüistica, e entà hèr qu'es ciutadans poguen accedir ara administracion publica en aranés.
2. Prepausar era conversion der Institut d’Estudis Aranesi (IEA), en Academia, en tot formalizar atau era autoritat lingüistica der occitan, aranés en Aran. Eth sòn procès de creacion deu passar per un acòrd de Govèrn dera Generalitat de Catalonha.
Solà s’a declarat fòrça satisfèt, pr'amor qu'“aué auem hèt un des passi mès importants e significatius, entara recuperacion lingüistica der aranés, dempús dera aprobacion dera Lei der occitan, aranés en Aran”, a dit.
Deth sòn costat, eth vicesindic 2au, deth Conselh Generau d’Aran, Eduardo Valdecantos, a dit a prepaus d'aguesti dus acòrds qu'"eth Conselh Generau d'Aran vò vier eth referent a nivèu institucionau e de gestion dera lengua occitana, aranés en Aran”.
Era comission se tornarà a amassar en octobre o en noveme, quan siguen publicadi es estatus dera naua Academia. A prepaus d'aguesta, era directora generau de Politica Lingüistica, Ivonne Griley, a explicat qu'era creacion e era constitucion dera Academia dera Lengua, ei un hèt “estrictaments lingüistic. Non podem cap agir ath marge des expèrts e dera coneishença”.
Critiques en Unitat d'Aran
Eth cap dera oposicion en Conselh Generau d'Aran, Francés Boya, critiquèc eth "baish perfil institucionau e lingüistic" d'aguest nau organisme. En tot aperar ath consensus que i aguèc en moment d'aprovar era Lei der occitan, aranés en Aran, Boya que prepausèc crear ua comission de seguiment entre es grops politics aranesi "damb er objectiu de trabalhar amassa entà garantir era superviuença der aranés e consolidar era nòsta identitat de pòble damb lengua pròpria”.
Segontes Boya era creacion d'aqueth organisme met eth consensus "en risc" pr'amor qu'adòpte "ues decisions aluenhades deth dialòg en un ahèr de país".
Ferriòl Macip
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari