La trèva a durat plan pauc a Kyiiv, e ièr de matin tornèron los afrontaments entre los manifestants e los policièrs amb fòrça violéncia. Lo darrièr bilanç oficial èra de 67 de mòrts e de desenats de ferits, fòrça d’eles per de balas. Segon qualques mèdias internacionals i a de cadavres estenduts sus la Plaça de l’Independéncia de la capitala ucraïnesa. Divèrsas bastissas publicas foguèron ocupadas pels manifestants. Mas sabèm pas gaire clar çò qu’a fach esclatar tornarmai la violéncia al centre de Kyiiv, après que se declarèsse una trèva. Qualques mèdias dison que lo Ministèri de l’Interior aviá avertit qu’un franctiraire tirava contra de policièrs; d’autres fonts dison que la polícia carguèt contra de manifestants qu’ocupavan una bastissa.
 
Lo president d’Ucraïna, Viktor Ianukovych, anoncièt dimècres una trèva en l’ofensiva contra los manifestants après una jornada sagnosa, amb vint e sièis mòrts. Lo president diguèt que reprendriá lo dialòg per que “se i tornèsse pas debanar un chaple e per estabilizar la situacion e aténher la patz sociala”. Abans d’ordenar l’arrèst de las operacions militaras, se reüniguèt amb los caps opausants pendent quatre oras e destituiguèt lo cap de l’armada. Pasmens, ordenèt sul pic de lo remplaçar per l’actual cap de la marina, l’amiral Iurii Iliin, en un gèst que s’interprèta coma un refortiment de l’armada.
 
França, Alemanha e Polonha an decidit de mandar en Ucraïna lors ministres dels afars estrangièrs per favorizar lo dialòg entre lo govèrn e los opausants. Lo president francés, François Hollande, assegurèt en una conferéncia de premsa conjoncha amb Angela Merkel e José Manuel Durão Barroso que la violéncia èra imperdonabla. “Avèm la volontat de sancionar los responsables d’aquela violéncia imperdonabla a Kyiiv”, çò diguèt Hollande de París estant. Lo president francés remembrèt que los ministres dels afars estrangièrs de l’UE ensagèron de s’acordar ièr a Brussèlas sus de sancions economicas e personalas contra Ucraïna, e mai se qualques estats, coma l’espanhòl, las preferisson evitar.
 
 
Cossí seguir los eveniments en Ucraïna?
 
— UkrStream prepausa de vidèos de camèras en dirècte de la carrièra Hrushevskoho e de la Plaça de l’Independéncia, epicentres de la protèsta a Kyiiv.
 
— Control Room Ukraine permet de seguir en dirècte las cadenas de television localas Espreso TV e Channel 5 Ukraine.
 
— La cadena d’informacions 24h/24 Russia Today fa un seguiment en dirècte dels eveniments.
 
—L’agéncia de nòvas Reuters fa tanben difusion d’imatges en dirècte.
 
—Lo jornal en ucraïnés e anglés Kyiv Post a una pagina de seguiment a la minuta, e tanben la BBC e The Guardian. En francés i a Le Monde e France TV Info.
 
— L’estatsunidenc The Washington Post a seleccionat setze comptes de Twitter indispensables per seguir la crisi: n’i a de  jornalistas, d’activistas e d’analistas expèrts en Ucraïna.
 
— La BBC prepausa de ligams dels principals mèdias del país.