L’extrèma drecha francista ven de menaçar Alain Vidal Sabatte, un factor del Martegue (País Marselhés), d’origina catalana, per aver afichat lo drapèl independentista catalan —amb l’estela— a la fenèstra de son ostal, del costat interior de la vitra.
 
Segon çò qu’el meteis explica sus sa pagina Facebook, ausiguèt un bruch a la boita de las letras e anèt veire çò que se passava. Lai trobèt una menaça escricha a la maquina en francés, sus una aficha del Front Nacional, que disiá “La tieuna bandiera la te pòdes fotre au cuou, tu enculat. Amb nosautres, leis estrangiers seràn fotuts defòra. La nòstra bandiera ten tres colors, pas cap d’estela roja. Tornarem passar per aquesta carriera dins quauquei jorns. Darrier avertiment (fai mèfi)”.
 
Nascut a Perpinhan en 1958, Vidal trabalha al Martegue dempuèi catòrze ans; trabalhèt abans a Marinhana, tanben dins lo País Marselhés, a partir de 1982.
 
Lo factor catalan a dich a Jornalet que deman denonciarà los faches a la polícia. “Sabi pas se son capables de me far mau”, çò diguèt Vidal, en apondent: “M’an pas fach paur, mai m’an fach pena”.