Aperaquí un desenat de policièrs, e se sap pas quant de manifestants, foguèron ferits dissabte passat en seguida d’una manfestacion a Nantas contra la construccion d’un aeropòrt en Bretanha, e ça que la aquela manifestacion foguèt una reüssida. E mai se los imatges de violéncia son los mai mostrats pels mèdias, lo movement ecologista breton capitèt d’acampar almens 520 tractors, 63 autobuses e aperaquí 60 000 personas per protestar contra la construccion d’un aeropòrt enòrme al costat de Nantas, a Kernitron-al-Lann, que los manifestants considèran insostenable e inutil.
 
La protèsta foguèt festiva e plena de creacions plasticas que mostravan l’imatge negatiu de la destruccion de las espècias protegidas a causa de la construccion d’aquel aeropòrt. Se debanèron tanben d’animacions pendent tota la jornada.
 
Pasmens, segon los manifestants, la prefectura de Nantas empediguèt lo passatge de la marcha pel Cours des Cinquante Otages, çò qu’es pas brica abitual. Alavetz, una partida del cortegi passèt per un luòc alternatiu del temps que l’autra ensagèt de passar pel trajècte previst inicialament. La polícia o empediguèt amb de balas de goma, de granadas estordissentas e de gases lacrimogèns, çò que provoquèt d’afrontaments dusca a la fin de la jornada. Lo cònsol de Nantas anoncièt que fariá sa denóncia “contra X” per totes los damatges causats.
 
 
Quaranta ans de lucha
 
Fa quaranta ans que se planifica la construccion d’un aeropòrt enòrme al costat de Nantas, a Kernitron-al-Lann. S’agís d’un projècte pensat en de burèus alonhats del terraire e qu’a trebolat tot un país, son biais de viure, sas relacions e que cèrca de desfigurar lo parçan.
 
A la fin dels ans 1970, una plataforma d’associacions s’èra organizada contra aquel aeropòrt e capitèt d’arrestar lo projècte amb de campanhas longas e massissas.
 
Dins las darrièras annadas, lo projècte es tornat sortir del tirador e menaça de destruire 2000 ectars de tèrras agricòlas, de bòsques e d’abitacions.
 
Dins una epòca de crisi economica, mas tanben de crisi d’energia e d’ecologia, l’utilitat d’aqueste projècte es mesa en question, en prenent en compte, sustot, que l’aeropòrt actual de Nantas fonciona pas amb tota sa capacitat e que dins la region i a ja 14 aeropòrts.
 
Dins lo movement antiaeropòrt se ditz qu’aqueste projècte es lo sòmi megaloman del socialista Jean-Marc Ayrault, primièr ministre de França, que foguèt cònsol de Nantas.