Antoinette Fouque, cofondadora del Movement de Liberacion de las Femnas (MLF) en 1968, moriguèt dijòus de matin a París dins sos 77 ans, çò anoncièron divendres passat “sas amigas de l’MLF” a l’AFP.
 
Dins una entrevista recenta, ela aviá refusat lo qualificatiu de “feminista”, que segon ela definissiá mai que mai la “servitud volontària que fan cèrtas femnas per s’adaptar al jornal Elle o a d’autres”.
 
Fouque nasquèt lo 1r d’octòbre de 1936 a Marselha, faguèt sos estudis de letras e venguèt doctora en sciéncias politicas. Foguèt ensenhaira, critica literària e traductritz. Figura istorica de la lucha pels dreches de las femnas, foguèt animatritz del grop Psicanalisi e Politica, un dels corrents mai importants del feminisme en Euròpa.
 
Creèt e dirigiguèt las edicions “Des Femmes” e en 1973 dobriguèt tres librariás “de las femnas” a Marselha, Lion e París, dirigiguèt lo Quotidien des Femmes e Femmes en Mouvement, e inaugurèt la dicha Bibliothèque des Voix, qu’es la primièra collecion de libres àudio en francés.
 
Foguèt tanben psicanalista e presidenta de l’Aliança Francesa a San Diego (Estats Units), abans de fondar en 1989 l’Aliança de las Femnas per la Democracia, que ne foguèt presidenta.
 
Dins los ans 1990 se consagrèt a la politica. Trabalhèt amb Michèle André, secretària d’estat pels dreches de las femnas, en 1990; e dos ans puèi fondèt lo club Paritat 2000 abans d’èsser elegida eurodeputada al Parlament Europèu en 1994, dins la lista Energia Radicala de Bernard Tapie. A Estrasborg foguèt vicepresidenta de la Comission dels Dreches de las Femnas e delegada de l’Union Europèa en la Conferéncia Mondiala de las Femnas a Pequin en 1995.
 
En 1995 publiquèt lo libre Il y a deux sexes que foguèt reeditat en 2004.