Aqueste dissabte, se teniá a Sydney la partida entre lo campion de Superliga Wigan e lo venceire de l’NRL, los Roosters. Tre la cinquena minuta, los australians marcavan pel centre Jennings. Los angleses èran despassats pel ritme e encaissavan dos novèls ensags abans la pausa: 18-0. Remi Casty fasiá sa primièra aparicion jol malhòt tricolor e se fasiá remarcar per unes braves caramèls e sas percussions. A la represa, los angleses marcavan, mas Jennings interceptava per puntar un tresen ensag. Los angleses coneissián un bon quart d’ora, marcavan dos còps mas los australians tornavan prene la marcha enabans per portar la marca finala, amb dos novèls ensags, a 36-14, e mostrar un còp de mai la diferéncia de ritme entre las doas competicions màgers de la planeta tretzista.
 
Al país, la dimenjada èra consacrada als quarts de finala de la Copa Lord-Derby. Sus la pelena de l’Estadi de Concas d’Orbièl, la formacion de Nacionala 1 de Vilagalhenc-Argon recebiá los catalans d’Elèit 1 de Palau. A mai d’un moment se vegèt pas tròp la diferéncia de nivèl (doas divisions!) sus la pelena! Mas los catalans capitèron fin finala a faire la diferéncia: 36-18.
 
A Lion, Carcassona prenguèt d’entrada los afars en man per se qualificar aisidament 46-14. A Tolosa, per contra, se debanèt una vertadièra partida de Copa: los Dragonets prenguèron d’avança, los tolzans tornèron prene l’avantatge mercé a dos ensags dins lo darrièr quart d’ora. Los Dragonets marquèron plan a doas minutas de la fin: ensag refusat per l’arbitre en rason d’una obstruccion e qualificacion per Tolosa: 22-18.
 
Dimenge, los tenents del trofèu d’Avinhon recebián sus lor pelena sintetica de l’Estadi Sant Ruf los limosencs per un revenge de la finala passada. Las doas esquipas faguèron a ten-tu-ten-ieu e, a aquel jòc, los provençals demorèron los mèstres: 30-24. Limós capita pas a sortir de l’espirala de la desfacha. Las mièjas finalas dels 22 e 23 de març, determinadas per tiratge al sòrt, metràn a las presas doncas Avinhon, Carcassona, Tolosa e Palau.
 
Los Dracs catalans clavavan la segonda jornada de Superliga a Castleford: privats d’Elima (suspendut 4 partidas), de Tomas Bosc (tocat a las còstas) e de Jamal Faquir (retractacion lo matin), los Dracs, en manca d’inspiracion ofensiva, indisciplinats e privats de pauma, tenián fins a la pausa (6-12) mas se fasián manjar tot crus (o serviguèron de carn per l’ollada?) pels Tigres: 32-6.
 
E s’i cal tornar metre tre divendres aprèp quauquas explicacions de tèxtes, visionatges de las vidèos e sesilhas d’entraïnament seriosas! D’aitan mai que los Dracs jogaràn lor primièra partida oficiala de la sason a Brutus amb la recepcion dels Rinocèros de Leeds qu’an ganhat las doas primièras partidas coma Saint Helens e los diables de Salford.
 
Dimenge, per la pola bèla del campionat, un afrontament de tria entre los dos primièrs s’anóncia al Molin entre l’FC Lesinhan e Tolosa; a L’Agulha, lo perdent de Limós-Dragonets aurà ja perdut la possibilitat de se qualificar dirèctament per las mièjas finalas. Los lesinhaneses venon de faire part de la signatura de l’ex-alièr de l’USAP, Farid Sid. Dins la pola B, Baó reçauprà Vilanuèva e Palau anirà al país de Loïsa Paulin, Realmont. En pola C, Carcassona torna a Lion per jogar aqueste còp en campionat e Avinhon reçauprà Albi.
 
 
 
 
Alan Roch