Aqueste 2 de març, se passarà l’86a ceremònia del Prèmis Oscar. 12 ans d’esclavitud, lo darrièr filme de Steve McQueen, lo director de cinèma anglés, es un dels favorits amb 9 nominacions demièg las qualas las del melhor filme, melhor director e melhor ròtle màger.
 
Aqueste filme se basa sus l’istòria vertadièra de Solomon Northup, un negre estatsunidenc del mitan del sègle XIX, nascut òme liure, que se fa raptar per èsser vendut coma esclau dins una plantacion de coton de Loïsiana.
 
Solomon, desesperat, descobrís rapidament l’univèrs brutal e inuman de l’esclavatge. La vida de familha confortabla que coneissiá a Nòva York desapareis per daissar plaça a un quotidian fait d’umiliacions, de castigaments fisics, de privacions e de trabalh forçat. Per subreviure a la siá misèria, li calrà amagar qu’es un òme letrut, li calrà aprene a oblidar tota dignitat umana. Li calrà aprene a acceptar la siá malastrada e quitament a venir coard.

Sens cap de possibilitat de donar la mendre marca de vida a sa familha pendent 12 ans, lo rescontre amb un fustièr canadenc cambiarà sa vida per sempre.
 
Lo ròtle de Solomon Northup es jogat per l’extraordinari Chiwetel Ejiofor, actor britanic d’origina nigeriana, ja vist dins los filmes Salt e Savannah. Vertadièrament, l’artista es possedit per son personatge. Mestreja totalament l’expression del còrs e de la fàcia. Li fa front un Michael Fassbender, a mitat baug, proprietari de plantacion cinic e crusèl, que se permet d’amanhagar los esclaus a moment donat e de los tumar l’estona d’aprèp.

Steve McQueen, que ja nos aviá susprés amb l’aspècte violentament realista dins la siá òbra Hunger, tornarmai nos fa tocar, al sens concret del mot, la violéncia faita als esclaus. Amb una mesa en scèna que jòga amb los anar-venir nos far sentir a l’encòp la somission e la vòlha de Solomon.
 
Aquesta istòria mòstra un episòdi pauc conegut de l’esclavatgisme als USA: los raubaments dels afroamericans liures. La realizacion de McQueen s’inscriu dins la dralha de dos filmes recents amb una tematica prèpa: Lincoln d’Steven Spielberg e Django desencadenat de Quentin Tarantino. Segurament i calrà entendre que los Estats Units vòlon tirar la leiçon d’un dels capítols mai esglasiants de son istòria. Es un filme mai que bon e es una granda leiçon d’umanitat que bolega las armas.


 
 
 

Terric Lausa
 
 
_____
12 ans d’esclavitud (12 years a slave) d’Steve Mac Queen - Amb: Chitewel Ejiofor e Michael Fassbender - Productor: Brad Pitt

Datas de sortida:
 
– Val d’Aran: 12 de decembre de 2013
– Valadas occitanas: 20 de febrièr de 2014
– Rèsta d’Occitània: 22 de genièr de 2014