Lo Parlament de Catalonha aprovèt ièr una mocion del Partit dels Socialistas de Catalonha (PSC) per reconéisser l’entitat territoriala d’Aran e aital s’assegurar que lo país occitan serà pas inclús dins cap de division territoriala pus granda, dins la nòva Lei dels Govèrns Locals de Catalonha. Totun, aquela mocion s’aprovèt amb d’emendaments prepausats per Convergéncia e Union (CIU) e per Iniciativa-Verds (ICV), que demandan al govèrn de Catalonha de contunhar de defendre l’aspècte veïcular de la lenga occitana dins l’educacion en Aran, de ne far la lenga preferenciala dins l’adminstracion, e mai de s’engatjar amb l’autogovèrn aranés. Pr’aquò, cal soslinhar l’emendament d’ICV, que demanda al govèrn catalan d’impulsar la Val d’Aran coma jonhent cultural, politic e economic entre los Païses Catalans e Occitània.
 
La mocion s’aprovèt amb 98 vòtes en favor; los 23 vòtes contra venguèron del Partit Popular (PP) e de Ciutadans (C’s) que critiquèron durament lo tèxt. Segon Ciutadans, se parla de “territòris inexistents” en se referissent a Occitània e als Païses Catalans, e se critica que se defenda l’aspècte preferencial de la lenga occitana. De fach, los pòrtavoses d’aqueles dos partits espanholistas remembrèron que lo Tribunal Constitucional espanhòl a ja mes en suspension los articles de la Lei de l’Occitan, Aranés en Aran, que dison que l’occitan deu èsser lenga preferenciala. Tant lo PP coma Ciutadans an refusat tanben de reconéisser la “singularitat nacionala” d’Aran, e mai se l’Estatut de Catalonha definís Aran coma “realitat nacionala occitana”.


_____
Intervencion del deputat aranés Àlex Moga