Aumenta de mai en mai la tension dins la peninsula de Crimèa, aquela republica autonòma d’Ucraïna amb una majoritat de populacion russa. Ièr lo ministre de l’interior del nòu govèrn interimari ucraïnés, Arsen Avakov, acusèt lo govèrn rus d’ocupar l’aeropòrt de Sebastòple, e aquò o qualifiquèt d’“invasion militara e d’ocupacion”. De mai, qualques oras abans, de desenats d’òmes armats intrèron dins l’aeropòrt internacional de la capitala de Crimèa, Sinferòpol. Pasmens, las autoritats ucraïnesas asseguran d'aver représ lo contraròtle dels aeropòrts. Las autoritats russas an negat tota implicacion dins l’ocupacion dels aeropòrts del territòri, e mai s’an reconegut qu’an aumentat la preséncia militara dins la zòna.
 
Dimècres, lo parlament de la Republica Autonòma de Crimèa, al sud d’Ucraïna, aviá anonciat que convocariá un referendum sus “lo melhorament de l’estatut d’autonomia e l’alargament dels poders”. A prepaus de la crisi politica, lo president de la cambra diguèt que “la sola sortida possibla es d’aplicar los principis del govèrn dirècte del pòble. Dins aquel sens cresèm que solament amb un referendum los ciutadans de Crimèa seràn capables de determinar lo futur de l’autonomia, per eles meteisses e sens cap de pression exteriora.”
 
Dijòus de matin, un grop d’òmes intrèron armats dins lo sèti del govèrn e del parlament de la Republica Autonòma de Crimèa, segon çò que raportèt la television locala ICTV. I issèron una bandièra russa e arborèron l’eslogan “Crimèa es Russia”. Los assalhidors portavan de ribans de color negra e irange, un simbòl rus de la victòria pendent la Segonda Guèrra Mondiala.
 
Segon qualques informacions, las bastissas publicas de Crimèa serián ocupadas per un grop nomenat Autodefensa de la Populacion Russofòna de Crimèa, un movement format per d’èx-militars e d’èx-agents de l’intelligéncia.
 
La capitala de Crimèa, Sinferòpol, protagonizèt abans ièr d’afrontaments fòrça violents entre los manifestants pròrusses e los manifestants partisans dels nòus dirigents ucraïneses qu’an pres lo poder.
 
Tot aquò se passèt qualques oras après que lo president de Russia, Vladimir Putin, ordenèsse a l’armada de metre las tropas en alèrta a l’oèst e al centre de Russia, segon çò qu’aviá raportat lo ministre de la defensa Sergei Shoigu.
 
Los Estats Units e l’Union Europèa an avertit Russia contra quina intervencion militara que siá en Ucraïna, una anciana republica sovietica que Putin considèra una “nacion sòr” e qu’el la voldriá integrar a l’Union Eurasiatica qu’es a bastir.
 
Las autoritats russas manifèstan que Moscòu interferirà pas dins los afars d’Ucraïna, segon çò que declarèt Valentina Matviienko, la pòrtavotz del Senat rus, a l’agéncia Interfax. Matviienko apondèt que Russia fariá pas usatge de la fòrça.
 
Pasmens, las declaracions del primièr ministre rus Dmitrii Medvedev, a prepaus dels interèsses de Russia e de sos ciutadans en Ucraïna, fan pensar als arguments emplegats pendent l’invasion de Georgia en 2008, quand el èra president.