Lo Conselh Representatiu de las Institucions Josievas de França (CRIF) faguèt dijòus passat a Tolosa un omenatge a Latifa Ibn Ziaten, maire d’un soldat assassinat en 2012. L’assassinat d’Imad Ibn Ziaten foguèt un dels crimes que lo jove tolosan Mohamed Merah faguèt en 2012 abans d’èsser abatut per la polícia.

La seccion de Miègjorn-Pirenèus del CRIF donèt un prèmi a Latifa Ibn Ziaten per onorar lo trabalh qu’a fach l’Associacion Imad Ibn Ziaten per la Joventut e la Patz, fondada dos meses après l’assassinat, per promòure entre los joves la laïcitat e lo dialòg interreligiós.
 
De centenats de personas participèron al sopar del CRIF, que demest elas cal soslinhar lo ministre de l’interior Manuel Valls, qualques elegits, de representants de qualques religions, lo cineasta Alexandre Arcady, e Samuel Sandler, lo grandpaire de tres de las victimas de l’escòla josieva Ozar Hatorah de Tolosa.
 
Latifa Ibn Ziaten declarèt a l’AFP que “l’islam es pas una arma de guèrra. L’islam es la patz, la tolerància, lo respècte. Lo mond que dison tuar en nom de l’islam… Non, se deu pas tuar!” Aquela femna que li rendon omenatge, dins sos 53 ans, es maire de familha e insistiguèt que “cal saber perdonar” e non pas gardar “l’asirança al còr”.
 
Son filh foguèt assassinat l’11 de març de 2012 a Tolosa per l’alavetz nomenat “assassin de l’escotèr”. Quatre jorns puèi, lo meteis criminal tuèt dos paracasudistas a Montalban. Qualques jorns mai tard tuèt tres enfants e un paire a l’escòla josieva Ozar Hatorah de Tolosa. Aqueles crimes son atribuits a Mohamed Merah, un jove delinquent tolosan qu’auriá dich qu’o faguèt en nom de la lucha islamista. Lo 22 de març, Mohamed Merah foguèt abatut dins sos 23 ans per la polícia qu’assalhissiá son apartament.
 
Lo ministre de l’interior Manuel Valls faguèt una crida a combatre “l’antisemitisme virulent” en se referissent als darrièrs cases d’antisemitisme sus Internet, a l’ensagista d’extrèma drecha Alain Soral e a l’umorista polemista Dieudonné. Sus aquel darrièr, lo ministre se diguèt “fièr” d’aver menat lo combat per far enebir sas representacions, e afirmèt: “degun pòt pas dire que sap pas quala es la vertadièra cara de Dieudonné M’Bala M’Bala”.
 
De son costat, la presidenta del CRIF de Miègjorn-Pirenèus, Nicole Yardeni, se mostrèt inquieta pel revelh de l’òdi, “de còps dissimulat jos la masca de l’antisionisme” e tanben dels “islamistas, l’extrèma drecha e l’utraesquèrra”. Aital respondiá al fach d’èsser estada agarrida a la manifestacion contra las discrimincacions omofòbas e antisemitas del 22 de febrièr passat a Tolosa, quand una partida dels manifestenats cridèron “Yardeni vai-te’n, lo CRIF faissistas, sionistas, anatz-vos-en”.
 
A aquel sopar èra tanben presenta Françoise Rudetski, de la Federacion Estatala de las Victimas d’Atemptats e Accidents Collectius (FENVAC segon sa sigla en francés), que venguèt “interpelar Sénher Valls perque dos ans après los dramas de Montalban e de Tolosa, los dorsièrs d’indemnizacion son al ponch mòrt”, segon çò que declarèt a l’AFP, en apondent que las indemnizacions fachas a las familhas de las victimas “son indecentas”.