ÈTA a promés de sagelar fins al darrièr arsenal d’armas, segon un comunicat que publiquèt dissabte passat lo jornal Gara. La banda ditz qu’a convengut amb la Comission Internacionala de Verificacion (CIV) qu’inutilizarà totas las armas, los explosius e los dispositius qu’a servats dins qualques amagatalhs. A dich tanben que s’agís d’un procès malaisit que depend pas unicament de sa volontat, en se refererissent a l’actitud del govèrn espanhòl, e que los obstacles que pòscan dificultar aquel procès ne pòt modificar las condicions. Lo grop garentís que las armas e los explosius son fòra usatge e reafirma que ne cal acabar amb çò que qualifican d’enfranhement dels dreches dels presonièrs politics bascos.
 
En concret, ÈTA ditz que la “nòva mission” convenguda amb la CIV se concretiza en dos ponches: d’un costat, la CIV verificarà lo procès de sagelament que menarà a tèrme ÈTA amb un metòde ja fixat e, de l’autre costat, demorarà dins las siás mans l’inventari que se faga de las armas, dels explosius e dels autres dispositius de l’organizacion. “Lo procès de sagelament dels arsenals a començat e l’engatjament d’ÈTA es de lo portar dusca a la fin, dusca al darrièr arsenal”.
 
Lo comunicat pòrta la data d’un jorn après la comparucion dels verificadors davant lo jutge de l’Audiéncia Nacionala espanhòla, lo 24 de febrièr, e demanda a totes los agents implicats dins lo procès “d’agir amb responsabilitat”. Atanben, ÈTA mòstra tornarmai lo sieu “engatjament total” per la resolucion del conflicte e per la patz: “reafirmam la nòstra disposicion a participar als dialògs e als acòrdis necessaris per despassar totas las consequéncias del conflicte, en inclusent lo desarmament d’ÈTA”. Amb mençon exprèssa a Arkaitz Bellon, lo presonièr basco recentament mòrt, e a la “crusèla politica penitenciària”, ÈTA soslinha “l’urgéncia de n’acabar amb l’enfranhement dels dreches que lo patisson los presonièrs politics bascos”.