Dison que la justícia es òrba, e lo dich es estat profetic dins lo cas de la senténcia que preten obligar lo govèrn catalan de cambiar lo sieu sistèma educatiu a la demanda qu’an fach solament quatre familhas. Segon una senténcia del Tribunal Superior de Justícia de Catalonha (TSJC), tant lo catalan coma l’espanhòl devon èsser las lengas veïcularas del sistèma educatiu catalan, per que los parents qu’o vòlgan pòscan demandar l’escolarizacion dels sieus enfants en espanhòl s’o creson convenedor. En consequéncia, la senténcia obliga lo govèrn de Catalonha, de la coalicion nacionalista CiU, d’adoptar las mesuras que fan besonh per totas aquelas familhas qu’o pòscan demandar.

A l’ora d’ara, lo sistèma educatiu catalan es basat sus l’immersion lingüistica, qu’establís que la lenga veïculara de tot lo cicle es lo catalan, e l’occitan en Val d’Aran. Dins lo cas que qualque familha o demande se li pòt far un supòrt especific en espanhòl. Cada annada mens de 20 familhas demandan aquela atencion personalizada, mas dempuèi qualques annadas la question es venguda una arma politica de la part dels partits nacionalistas espanhòls.
 
Coma en d’autras escasenças similaras, lo govèrn de Catalonha a reaccionat immediatament e a anonciat que presentarà un recors davant l’instància judiciala superiora. En fach, los conflictes ligats a la lenga e l’educacion son constants dempuèi que Catalonha a un regim autonomic. Malgrat que qualques senténcias del Tribunal Constitucional, lo maximal organ judicial espanhòl, an legitimat lo sistèma d’immersion lingüistica en catalan, e en occitan en Aran, sovent d’autras instàncias juridicas prononçan de senténcias desparièras qu’an convertit la batalha judiciala per la lenga en un problèma cronic.

De manièra sospiècha, lo quite TSJC a aprofechat aquel atac contra l’ensenhament en catalan per far d’una pèira dos còps e a anullat l’usatge preferencial de la lenga catalana dins la  la Comuna de Barcelona. En responsa a un recors del Partit Popular (PP), formacion que lidera lo president espanhòl Mariano Rajoy, lo tribunal considèra que la preferéncia d’usatge del catalan viòla lo principi de cooficilitat del catalan e de l’espanhòl. La senténcia judiciala establís qu’es al ciutadan de causir la lenga de relacion amb la Comuna de Barcelona e pas l’inversa.

Ça que la, lo primièr adjunt al cònsol de Barcelona, lo sobeiranista catalan Joaquim Forn, a mes en evidéncia que se modificaràn pas los critèris lingüistics de la vila e a remembrat que, tot ciutadan pòt èsser acuelhut en espanhòl, mas “la lenga pròpria de Catalonha es lo catalan”.