Lo jornal francés Libération a publicat una enquèsta de la jornalista Éliane Patriarca sus la fòrta erosion marina que patisson las plajas de Gasconha. Aquela erosion s’es vista aumentada per las nombrosas tempèstas d’aqueste ivèrn. Las collectivitats localas an pres la mesura del risc e anticipan un replegament estrategic.

Segon lo reportatge de Libération, an ja començat las fòrtas marèas, d’aiga viva d’equinòcci, sus la còsta atlantica. Mas ongan son arribadas amb un fòrt chepic pels gascons del litoral, qu’an viscut dempuèi decembre una seguida de tempèstas qu’an erosionada la còsta.
 
Lo chepic es especialament grèu a Solac de Mar (Medoc), ont, per exemple, un immòble bastit dins los ans 1960 a 200 mètres de l’ocean, ara se tròba a 16 mètres del bauç de la duna. La bastissa, que pòt lèu tombar, foguèt evacuada en genièr. Al delà, lo club de surf de Solac foguèt engolit per l’ocean e una bastida es al bòrd del bauç.
 
A l’estacion balneària de Montalivet se son brigalhats quitament de blòts de betum antierosion e las plajas son estadas engolidas, coma tanben a La Canau. En luòc de plajas i a de bauces de duna.
 
Segon aquel reportatge, l’impacte de l’erosion d’ongan es superior a aquel que causèt la tempèsta Xynthia, que provoquèt de damatges serioses a la còsta gascona en febrièr de 2010.
 
L’erosion marina del litoral gascon es un fenomèn natural. En ivèrn las plajas desapareisson tant que las èrsas arriban fins a las dunas. En prima e estiu, las plajas apareisson amb lo retorn progressiu de la sabla e dels còdols. La diferéncia entre ablacion e ganh mesura la reculada del tròç de còsta. Es un fach que se passa dempuèi la darrièra glaciacion, fa qualques desenats de milièrs d’ans, mas que lo cambiament climatic es a accelerar. Segon de scientifics interrogats per la jornalista, la situacion d’aqueste ivèrn es excepcionala.
 
La region d’Aquitània a pres lo problèma a braçacòrs e a creat un agropament d’interès public qu’assòcia de collectivitats territorialas, de comunautats de comunas e l’estat. A l’ora d’ara, lor estrategia de trabalh es d’identificar quals son los endreches que se pòdon daissar a la mar e quals cal protegir a causa d’enjòcs umans e economics.
 
 
 
_____
Libération: Aquitaine, des plages assaillies par la mer