Aqueste febrièr passat en Iraq, almens 703 personas son estadas tuadas, e 1381 feridas, coma consequéncia d’atemptats e d’actes de violéncia. Aquela chifra, raportada per la Mission de las Nacions Unidas en Iraq (UNAMI), compren pas las victimas enregistradas dins la província d’Al Anbar. La majoritat dels mòrts son de civils, 564, del temps que los 139 restants son de soldats de l’armada iraquiana, encara segon las donadas de l’UNAMI, que tanben dison qu’entre los ferits, 1179 son de civils e 202 de militars.
 
“Los caps politics, socials e religioses an la responsabilitat de luchar contra lo terrorisme qu’afronta Iraq”, çò ditz lo representant de l’UNAMI, Nikolaj Mladenov, qu’explica que “solament en trabalhant ensems los iraquians poiràn bastir una societat democratica ont se respècte la lei e se protegisca los dreches umans”.
 
Las victimas de la província occidentala d’Al Anbar son pas compresas dins aquel rapòrt perque an “pas pogut verificar aquelas chifras d’un biais independent ni solament estimar la situacion dels mòrts e dels ferits civils”, çò precisa lo rapòrt. Per contra, segon lo comitat de santat del conselh provincial d’Al Anbar, en febrièr, 298 civils son mòrts e 1198 son estats ferits, victimas dels atemptats dins la província. Aquò elevariá a 1001 lo nombre de mòrts en d’atemptats en Iraq.
 
Al Anbar es la scèna d’afrontaments entre l’armada governamentala e qualques grops armats, mai que mai de l’Estat Islamic en Iraq e al Levant. Per rapòrt a tot Iraq, la violéncia confessionala e los atemptats terroristas son a aumentar. En 2013 moriguèron mai de 8860 personas, dont 7818 civils, segon las chifras de l’ÒNU.