Del 17 al 29 de març, se debanarà l’edicion 2014 de Fasètz la Lenga en Cabardés que metrà enabans l’expression artistica occitana dins mantes domenis —cant, teatre, musica, dança…— mercé a d’espectacles e de rescontres per totes que fan rampelada a las coneissenças istoricas, a l’esperit convivial mas tanben a la creacion. La manifestacion se dobrirà lo diluns 17 de març a Vilagalhenc amb una estrena mesa en musica pel grop vocal Cossí que Siague, abans un recital de La Sauze que, dempuèi bèl temps, fa rimar los mots, cèrca dins l’expression populara lo mot e l’expression que pican just; son inspiracion se noirís dels cadajorns… Un mejan de primièra per se botar la lenga d’òc en bocas e per las aurelhas, per una panta de rire o unes moments d’emocion que vos rescalfaràn lo còr…
 
Puègnautièr recebrà los moments consagrats a la medievalitat occitana lo divendres 21 de març, amb una presentacion del projècte occitanocatalan d’escritura La Controvèrsia de Puègnautièr, abans una representacion de la pèça Les Bougres pel Théâtre du Maquis. Amb aquesta pèça, la tropa met en scèna lo rodatge d’un filme que s’apièja sus la presa de Carcassona pels crosats en 1209. Los comediants jògan sus l’empont e lo filme 3D balha una autra vision mercé als biaisses especials del cinèma! Los comediants fan rescontrar atal passat e modernitat per un public que vei cossí se fargan imatges, musicas e sons…
 
La dimenjada serà consagrada a unes moments festius e convivials. Lo dissabte 22, dins la tota novèla sala René-Douce de Ventenac, serà lo moment de la gostosa taulejada. Seguirà un balèti animat par Tres Bal, la formacion d’Erau qu’entraïna dins un balèti leugièr, eficaç e trufarèl. La calor del cant occitan recep lo sosten del swing de la tuba e lo nhac de l’acordeon. Una tripla aligança que fa espelir una color musicala plan particulara, mesa al servici d’un repertòri de cants per dançar çò tradicional e per de creacions: una complicitat que buta lo public a intrar dins la dança per venir actor de la fèsta.
 
Puègnautièr serà lo fogal de las activitats del dimenge 23: un talhièr-cosina de matin (10h) per descobrir los secrets de qualques recèptas del terrador e la passejada-descobèrta del vèspre menarà, en companhiá de “Patrimoines, Vallées des Cabardès” dels gres de Liet a la pèira levada del Bòsc de More. Lo conte serà a l’onor per la velhada d’Argon del dimars 25 amb lo roergàs Ives Durand, que trèva la contrada coma un joglar d’un còp èra per contar e contar encara los mila e un racontes que tendràn esperdigalhat l’espectator. Passa d’un mot a l’autre e de l’òc al francés, jòga totes los personatges, los fa viure, patir o rire. Ten una biaça refofanta de tresaurs qu’intraràn dins vòstras aurelhas...
 
Dimères 26, serà question d’istòria a Mossolens amb la conferéncia de Felip Martèl suls occitans fàcia al conflicte de 1914. Se trucan dins los primièrs tempses a las representacions negativas de lor valor militara supausada. La lenga d’òc gardèt de longa una plaça de tria dins la vida vidanta dels soldats: jornals de trencada, correspondéncias...
 
Una creacion clavarà aquesta edicion de Fasètz la Lenga en Cabardés, lo dissabte 29 a Ventenac, amb l’espectacle que lo grop Òc consagrarà a Renat Nelli per mejan de cants, musicas, lecturas e imatges difusats en grand format per una immersion dins l’univèrs magic e poetic de l’escrivan carcassonnés. Mai d’una orada de concèrt, que farà intrar lo public al còr de l’Edat Mejana, al còr d’Occitània e de Lengadòc, al còr de l’òbra bèla de Renat Nelli.
 
Los escolans dels cinc vilatges recebràn los diluns 17 e 24 e los dimars 18 e 25 la vesita del musician Joan-Marc Paraire per una descobèrta de las sonoritats dels instruments tradicionals. Talhièrs de rescontre e de discussion, dobèrts a totes, dobriràn las seradas d’Argon e de Mossolens.
 
Lo grop vocal de l’associacion Cossí que Siague prendrà part a l’omenatge a Frederic Mistral en cantant al recampament del dimars 25, a 10h du matin, Travèrsa Frederic Mistral a Carcassona.
 
La quinzenada Fasètz la Lenga en Cabardés es organizada per l’associacion que pòrta lo meteis nom, amb lo concors financièr del conselh regional de Lengadòc-Rosselhon, del conselh general d’Aude e de las comunas d’Argon, Mossolens, Puègnautièr, Ventenac e Vilagalhenc e amb lo concors de l’IEO Aude, del Cercle Occitan del País de Carcassona, de la FAÒL, de Patrimoines Vallées des Cabardès, de l’AREP Vilagalhenc, de l’FLL Ventenac, del Fogal Sòciocultural de Mossolens, del Servici Cultural de Puègnautièr e dels mèdias (Ràdio Lenga d’Òc Narbona, RCF País d’Aude)
 
Per la programacion detalhada, consultatz lo blòg.
 
 
 
 
IEO Aude