L’ostal d’edicion Mondadori, proprietat de la familha de l’èx-primièr ministre italian Silvio Berlusconi, lancèt la setmana passada la primièra revista consagrada exclusivament al papa Francés Ir. S’apèla Il mio papa (“mon papa”), es setmanièra e se vend al prètz de cinquanta centims d’èuro. Amb un tiratge inicial de tres milions d’exemplars, lo setantenat de paginas d’Il mio papa conten de declaracions, las reünions, las activitats, los desplaçaments e de nombrosas fotografias restacadas a la vida vidanta del papa Francés.
 
Coma d’autras revistas del grop Mondadori, Il mio papa a un ton populista e s’adreiça, de fach, als afogats del Sant Paire, que li pòdon mandar de poèmas e que i tròban, dins lo primièr numèro, un postèr desplegable de Francés.
 
Pel director, Aldo Vitali, la revista nais après aver observat que l’eleccion de Francés “a generat una nòva atencion sus l’apròchi dels tèmas etics, religioses e morals”.
 
Lo jornalista italian Michele Boroni n’a legit lo primièr numèro e n’a soslinhat aquelas causas dins Wired.it.