La lista Alternativa L’Isla de Baish qu’ei ara completa e serà lèu publicada dins la premsa locala. S’agís d’ua lista Bastir-Municipalas 2014, per’mor que mantas personas presentas dins aquesta lista an signat la Carta d’engatjament deus candidats Bastir. Cau saber que dincas a l’ora d’ara, sonque le cap de lista, le Joan-Luc Davezac, èra declarat signatari. Ara que la lista es completa, dab 29 sòcis, podèm desvelar que i son nombroses d’aver aderit a Bastir.
 
En mès de Bastir, aquesta lista ei sostenguda per d’ecologistas, per Cap 21 —le partit de l’anciana ministra de l’environament, Corinne Lepage—, e sustot per l’Amassada Ecociutadana 32, que la Melania Borgés, presenta en bona plaça sus la lista, n’ei la cofondadora (dab l’Alèxi Boudaud qui eth demòra a Aush).
 
Quitament se serà oficialament inaugarat sonque le dissabte 15 de març de maitin, dempús le dissabte 8 de març, le locau de campanha d’Alternativa L’Isla-de-Baish qu’ei d’ara enlà dubèrt au bèth miei de la ciutat, au 13 de l’Avenguda deu Comandant Parisòt, dab la bandièra occitana au dessús de la pòrta e, coma de costuma, les sòcis de la lista hasquèren en parallèl le dissabte 8 de març ua brava distribucion de papieròts Bastir bilingües (occitan-francés) capvath le mercat setmanèr.
 
Alavetz, segon le resultat electorau, i aurà aitant d’elegits de Bastir coma de conselhèrs municipaus gessits d’aquesta lista (tanben, 15 son en liça entà la comunitat de comunas Gasconha Tolosana), per’mor que totas las prumèras personas de la lista son, de fèit, signatàrias Bastir... D’aqueste biais, qu’ei quauquarren d’unic e d’inedit, per’mor que se l’idèa de Bastir èra de prumèr de presentar ua o quauques personas dins ua lista “tradicionala” (d’esquèrra o de dreta, totjorn hòra l’extrèma dreta), e ben fin finala, avèm ací tota ua lista occitanista e qu’ensaja de’s presentar a l’encòp contra la lista d’esquèrra sortenta, e tanben contra la lista de dreta sostenguda per Jean-François Copé.
 
Veiram plan coma tot aquò se va debanar, saben plan qu’ua lista occitanista, sostenguda per d’ecologistas, a pauc de probabilitats de’s trobar plaça au bèth miei deu tradicionau trencament dreta-esquèrra de la politica francesa... Mès qui sap? L’avénguer nos ac dirà, arren es pas jamès ganhat per avança.
 
 
 
 
Jeròni Picas