Lo conselh superior de Crimèa, lo parlament, aprovèt ièr una declaracion d’independéncia de la fins ara republica autonòma ucraïnesa. La resolucion intrèt en vigor tre que foguèt aprovada, amb lo vòte favorable de 78 dels 100 deputats, e reïtèra la volontat d’aderir a la Federacion Russa. Aquò es lo pas prèvi que las institucions de Crimèa fan per son incorporacion a Russia, que se votarà en referendum dimenge que ven, e que se prevei qu’aja un resultat clarament favorable.
 
“Crimèa, coma estat independent, s’adreiçarà a la Federacion Russa après lo referendum per prepausar l’integracion a Russia en qualitat de subjècte federat”, çò diguèt ièr un pòrtavotz parlamentari.
 
La resolucion aprovada pel parlament de Crimèa mençona lo precedent de Kosova per justificar la decision presa unilateralament. La decision “a pres en consideracion la confirmacion del tribunal internacional de l’ÒNU a respècte de Kosova, lo 22 de julhet de 2010, sul fach que la declaracion unilaterala de l’independéncia d’una part d’un estat viòla pas las nòrmas del drech internacional”.
 
Segon l’agéncia ITAR-TASS, lo tèxt ditz: “Se los residents en Crimèa vòtan per l’adesion de Crimèa e de Sebastòple a Russia coma entitat constituenta, Crimèa serà declarada una republica independenta après lo referendum. En se basant sus los resultats del referendum, Crimèa s’adreiçarà a Russia per i aderir coma entitat constituenta”. E apond que Crimèa serà un estat democratic, secular e multinacional.
 
Lo govèrn ucraïnés a declarat illegal lo referendum en Crimèa de dimenge.
 
 
 
 
_____
Editorial: Lo vespièr crimean