S’es commemorat lo 55n anniversari del soslevament de Tibet contra l’ocupacion chinesa. Lo lideratge tibetan insistís sul plan autonomista del Dalai Lama. An presentat un rapòrt que testimònia la militarizacion de Tibet a travèrs d’imatges del ret social Sina Weibo.

Lo primièr ministre de Tibet en exili, Lobsang Sangay, a dich que “la lucha per Tibet demenirà pas”, entre d’autras rasons perque “es ara dirigida per una nòva generacion de tibetans” que “clarament e a votz nauta demanda son identitat, libertat e unitat”. Son de paraulas del sieu discors a l’ocasion del 55n anniversari de la rebellion tibetana contra l’ocupacion chinesa, iniciada lo 10 de març de 1959.
 
La commemoracion arriba sièis ans après que se debanèsse la darrièra granda revòlta tibetana contra China, en 2008, que s’esperlonguèt pendent de setmanas per tota la geografia de Tibet. Dempuèi 2009, una seguida de tibetans an protestat contra l’ocupacion chinesa en se cremant: son 127 personas, segon lo sit web tibetan Phayul.
 
Segon Sangay, las revòltas e las immolacions son tanben de rasons per pensar que los tibetans arrestaràn lor resisténcia quand atenheràn l’objectiu de la democratizacion e de l’autonomia. Dins lo discors, lo primièr ministre en exili insistís tornarmai sul plan autonomista del Dalai Lama coma lo camin “mai efectiu per n’acabar amb lo patiment en Tibet”. Sangay ditz qu’espèra que la nòva direccion chinesa, amb lo president Xi Jinping davant, “adòpte aquela posicion pragmatica e moderada”.
 
Lo plan autonomista del Dalai Lama prevei la reünificacion de las tres províncias istoricas de Tibet (U-Tsang, Kham e Amdo) e la creacion d’un poder legislatiu e executiu tibetan amb plen autogovèrn intèrne. China se reservariá las competéncias dels afars estrangièrs e de la defensa.
 
 
Un rapòrt sus la militarizacion de Tibet
 
E en coïncidint tanben amb la commemoracion del 55n anniversari, la Campanha Internacionala per Tibet a publicat un rapòrt sus la militarizacion del país en mans de las fòrças chinesas. Dison, los responsables de l’entitat, que las informacions se son obtengudas a partir dels imatges e donadas que los toristas chineses que vesitan Tibet publican sul ret social Sina Weibo. Lo rapòrt conclutz que los toristas chineses demòran estonats del nivèl de militarizacion e contraròtle en Tibet, “çò qu’es marcadament diferent de lors expectativas, formadas a travèrs de la propaganda oficiala”.
 
 
 
 
 
_____
Aqueste article ven del jornal catalan Nationalia, amb qui Jornalet a un acòrdi de collaboracion.