Era dimenjada passada, eth Servici d’Informacion e Atencion ara Hemna (SIAH) deth Conselh Generau d’Aran organizèc diuèrsi actes entà commemorar eth Dia Internacionau dera Hemna, pera luta des hemnes entà auer egalitat d’oportunitats.
 
Eth dissabte, ena Plaça dera Glèisa de Vielha, auec lòc era lectura deth manifèst en commemoracion ath dia, a cargue dera conselhèra deth torisme, comèrç e consum, Anna Díaz. E eth dimenge, se celebrèc era Prumèra Corsa dera Hemna, ua corsa-caminada damb un naut perfil simbolic, entà reconéisher er esfòrç compartit per hemnes e òmes a favor dera justícia sociau e peth camin qu’encara cau recórrer entà arténher era egalitat efectiva.
 
Aquera corsa siguec possibla gràcies ara ajuda e ar entosiasme deth Club Atletic dera Val d’Aran (CAVA), expèrts en mond der espòrt, damb era collaboracion dera comuna de Vielha e Mijaran, des Volentaris d’Aran e des centenats de persones que voleren participar en aguesta apassionanta jornada.
 
 
 
 
Conselh Generau d’Aran