ShaoLan, una taiwanesa que demòra a Londres, explica que quand ensagèt d’ensenhar d’escriure en chinés a sos enfants anglofòns, s’avisèt qu’èra fòrça complicat. Après capitar pas dins l’assag de cercar qualque metòde aisit d’escritura d’ideogramas, decidiguèt ela de ne far un. S’apèla Chineasy, se publiquèt la setmana passada e, de verai, pòt èsser lo melhor assag de trencar la Grand Muralha de l’incompreneson entre Orient e Occident.
 
“De las lengas mai parladas dins lo Mond, lo chinés es considerat la mai de mal d’aprene”, çò afirma ShaoLan, “mai que mai a causa del grand nombre e de la complexitat dels sieus caractèrs o ideogramas.” Son metòde d’aprendissatge, Chineasy, part del principi de las pèças de Lego: “Quand sabes ja qualques caractèrs basics (o blòcs de construccion), pòdes començar de los emplegar per formar de mots mai complèxes que, en los combinant, te permeton de crear de frasas simplas e de comentaris. Es tant aisit coma aquò!”
 
La tòca es de permetre al mond d’aprene a legir lo chinés aisidament a partir de la reconeissença de caractèrs a travèrs d’illustracions simplas.