Als referendums independentistas d’Escòcia del 18 de setembre que ven, e de Catalonha lo 9 de novembre, cal apondre dos vòtes de mai que se debanèron dimenge passat: d’un costat lo referendum exprès de Crimèa, promogut per la comunautat russofòna, en vista de la secession d’aquela republica autonòma d’Ucraïna e de son eventuala incorporacion a Russia, e de l’autre costat, plan mens mediatizat, lo plebiscit numeric que qualques grops independentistas venèts organizan pendent tota aquesta setmana, del 16 al 21 de març.
 
S’agís d’una consulta populara que prepausa als ciutadans, prèviament enregistrats, de votar se vòlon recuperar la sobeiranetat de l’anciana Republica de Venècia, desmantelada per Napoleon en 1797, amb una question tan clara coma sa responsa: “Volètz que Venèt venga una republica federala, independenta e sobeirana?” Las responsas possiblas son “òc” o “non”.
 
Lo conselh regional de Venèt a pas encara aprovat la convocacion d’un referendum consultatiu, es pr’amor d’aquò que la còla de Plebiscit 2013 a organizat aquel vòte, que segon los organizaires es “complementari” e non pas alternatiu al referendum consultatiu oficial que lo conselh regional deu menar a tèrme. Lo vòte se fa per Internet e per las personas qu’ajan pas de connexion, l’organizacion a previst d’installar d’ordenadors publics.
 
En setembre passat, lo conselh deviá decidir se fasiá la convocacion del referendum, mas la question se poguèt pas votar perque se decidiguèt d’ajornar la decision.