Los abitants de Crimèa aprovèron ièr en referendum la separacion d’Ucraïna e l’annexion a la Federacion Russa amb 95,5% dels vòtes. segon las donadas oficialas. La participacion a despassat l'80%, e mai se los tatars, los autoctòns del país qu’a l’ora d’ara son solament 12%, anoncièron un boicòt del vòte. Los Estats Units e l’Union Europèa an dich que reconeisseràn pas lo resultat d’aquel referendum, que Russia sosten.
 
Los 1200 collègis electorals èran protegits per las milícias d’autodefensa crimeanas, e mai pels soldats e tancs russes sens marca distintiva. La jornada se debanèt, totun, sens incidents.
 
Lo govèrn de Crimèa demandarà, doncas, a Moscòu que l’accèpte coma un territòri de mai de la Federacion Russa.
 
 
Vòte dins la polemica e la tension
 
Lo vòte arribèt còp sec dins un encastre ont es a aumentar la tension diplomatica, e quitament militara, entre Russia e Ucraïna. Dissabte lo govèrn d’Ucraïna aviá denonciat que de tropas de l’armada russa avián fach una incursion dins la region de Kherson, una region del sud d’Ucraïna, al nòrd de la peninsula de Crimèa. Tanben dissabte, Russia empediguèt que s’aprovèsse al Conselh de Seguretat de l’ÒNU una resolucion presentada pels Estats Units per declarar illegal lo referendum de Crimèa.
 
E tanben dissabte, lo parlament d’Ucraïna aprovèt, amb 278 vòtes sus 296, la dissolucion del parlament regional de Crimèa, just un jorn abans la celebracion del referendum. La velha del vòte, i aguèt doncas de tension e quitament de violéncia en Ucraïna; dins la vila de Kharkiv i aguèt doas personas mòrtas dins d’afrontaments entre manifestants pròrusses e pròucraïneses.
 
Las autoritats russas sostenon totalament lo vòte, del temps que las ucraïnesas avertisson qu’es illegal. E los Estats Units an fach pression en alertant que i aurà de sancions. Al delà, lo Pentagòn a dich que tendrà un contingent sus la Mediterranèa pr’amor de la crisi e Ucraïna, segon çò que diguèt la BBC. De son costat, Russia, a despart de la darrièra incursion denonciada per Ucraïna, a mogut una colomna de veïculs militars e d’engenhs d’artilhariá al nòrd de Crimèa.
 
Los agents frontalièrs d’Ucraïna revisan ja los trens que van de Crimèa a la rèsta d’Ucraïna.
 
 
D’observaires internacionals ultradrechistas
 
Un dels faches mai susprenents d’aquel referendum, es que la television estatala russa NVT publiquèt de declaracions de l’ultradrechista catalan Enric Ravello, presentat coma “deputat al parlament espanhòl per Ucraïna” e coma observaire internacional. Ravello es estat lo secretari de relacions internacionalas del partit xenofòb Plataforma per Catalonha (PxC), qu’a pas de representacion al parlament catalan nimai a l’espanhòl. Segon los mèdias ucraïneses, Ravello a viatjat amb un trentenat d’autres observaires “ultradrechistas e neostalinistas”. Lo jornal catalan VilaWeb ne rapòrta lo fach e se demanda perqué l’ultradrecha es interessada a sosténer l’imperialisme rus.
 
 
De son costat, l’Organizacion per la Seguretat e la Cooperacion en Euròpa (ÒSCE) foguèt pas autorizada a mandar d’observaires.
 
 
 
 
_____
Editorial: Lo vespièr crimean