L’Union Europèa aprovèt ièr de sancionar 13 dirigents politics e militars de Russia e 8 de mai d’Ucraïna, segon çò que publica VilaWeb. Los ministres dels afars exteriors de la còla dels 28 se son acordats per lor enebir l’intrada dins tot país de l’UE e per congelar totes lors comptes bancaris, lors proprietats immobilièras, lors accions de societats e d’autres actius, a aqueles 21 responsables, car son implicats dins l’organizacion del referendum de Crimèa, que l’UE considèra illegal e illegitim. Ça que la, se sancionarà pas, per ara, Vladimir Putin e son entorn de ministres, e mai se se “poiriá prene mai de mesuras dins los jorns venents”, çò a dich lo cap de la diplomacia lituana, Linas Linkevičius.
 
De mai, l’Union Europèa refusa lo resultat del referendum de Crimèa. “Tot referendum que se convòque en qualques jorns, sens cap de campanha ni accès dels caps del país, pòt pas aver de credibilitat”, çò diguèt lo ministre dels afars estrangièrs britanic, William Hague. Per Hague, es inacceptable que la crisi en Crimèa se gerisca “amb la fòrça e las menaças e non pas amb la negociacion”.
 
La nauta representanta de la diplomacia europèa, Catherine Ashton, faguèt una crida a Russia per que dialoguèsse amb los caps d’Ucraïna e per que se trobèsse una solucion pachada a la crisi. 
 
De son costat, lo ministre dels afars estrangièrs de Luxemborg, Jean Asselborn, assegurèt que Russia veiriá las consequéncias de sas accions en Crimèa. “Cal gardar la realpolitik”, çò diguèt lo ministre luxemborgés, en apondent que “degun pensa pas a una solucion militara”. Asselborn demandèt una responsa energica de l’UE per arturar Russia, lo desplegament d’una mission internacionala en Crimèa e l’organizacion rapida d’eleccions presidencialas en Ucraïna.
 
Los Estats Units restaràn pas los braces crosats
 
Lo govèrn dels Estats Units a dich que restarà pas los braces crosats, perque considèra que las autoritats russas an fach una “apropriacion de territòris per la fòrça”. De mai, l’Ostal Blanc refusa aquel referendum e avertís que la comunautat internacionala ne reconeisserà pas lo resultat, car “s’es fach jos la menaça de la violéncia e jos l’intimidacion d’una intervencion militara russa que viòla lo drech internacional”.
 
 
Lo Parlament de Crimèa a demandat l’incorporacion a Russia
 
96% dels votants del referendum de dimenge passat en Crimèa sostenguèron l’adesion a la Federacion Russa, segon la comission electorala, que tanben anoncièt que la participacion foguèt fòrça nauta: mai de 70% del cens. Lo referendum se faguèt al mitan d’una granda tension diplomatica e, de mai, Ucraïna aviá alertat sus de movements de tropas russas dins las siás frontièras. Lo parlament de Crimèa demandèt ièr diluns de manièra formala l’adesion a Russia, e declarèt lo roble moneda oficiala, e mai demandèt que la peninsula foguèsse dins lo fus orari de Moscòu e non pas dins lo d’Ucraïna.
 
De son costat, lo govèrn ucraïnés a mobilizat los militars de resèrva.
 
 
L’UE a sauput distinguir plan lo referendum crimean del catalan
 
Lo secretari dels afars exteriors de la Generalitat de Catalonha, Roger Albinyana, expliquèt ièr, a Catalonha Ràdio, que l’Union Europèa a sauput distinguir plan lo referendum crimean del referendum catalan per l’independéncia prepausat pel 9 de novembre que ven. 
 
 
 
 

_____
Domergue Sumien: Crimèa e Occitània: un pauc d’estrategia lingüistica
Joan Marc Leclercq: Ucraïna, manipulacion o incompeténcia
Editorial: lo vespièr Crimean