Un soldat de l’armada ucraïnesa moriguèt abans ièr en l’atac d’una basa militara de Crimèa, segon çò qu’a raportat l’armada ucraïnesa e segon çò que ditz la BBC. S’agiriá de la primièra victima causada per las fòrças russas dins la peninsula dempuèi que votèron son annexion a Russia, e dempuèi que lo president rus, Vladimir Putin, signèsse l’annexion de Crimèa a la Federacion Russa.
 
Lo primièr ministre ucraïnés, Arsenii Iatzeniuk, declarèt que lo conflicte èra passat “de la fasa politica a la fasa militara”. “Uèi las tropas russas an començat de tirar contra los nòstres soldats, aquò es un crime de guèrra”, çò diguèt Iatzeniuk, qu’a demandat una reünion urgenta dels ministres de la defensa rus, ucraïnés, estatsunidenc e britanic “per evitar que i aja un conflicte militar”.
 
Per contra, segon d’informacions del jornal espanhòl Público, la polícia crimeana auriá arrestat lo presumit franctiraire qu’auriá tuat lo soldat ucraïnés. Aquel presumit franctiraire seriá un jove ucraïnés de 17 ans que vendriá de la region de Lviv, a l’oèst del país, e segon de fonts del Ministèri de l’Interior crimean, seriá militant del grop ultradrechista ucraïnés Sector de Drecha (Pravyi Sektor).