L’èx-president d’Egipte, Husni Mubarak, es estat condemnat a perpetuitat pel Tribunal Penal del Caire; aquel a jutjat que Mubarak foguèt complice de l’assassinat de 846 manifestants pacifics pendent las protèstas dins la plaça Tahrir arunan, e qu’el ordenèt de las reprimir. Una revòlta que comencèt lo 25 de genièr de 2011 fòrabandiguèt Mubarak del poder un mes après.

Tanplan lo tribunal a condemnat a perpetuitat l’èx-ministre de l’Interior, Habibi Al Adli. Per contra, a absolgut los filhs de Mubarak, Alla e Gamal, acusats de corrupcion, e los sièis èx-comandants policièrs que compausavan lo nuclèu dur de seguretat del ministèri de l’Interior. De la meteissa faiçon, tant Mubarak coma Al Adli son estats absolguts de las cargas de corrupcion e desvirament de fonzes publics. Lo tribunal a dich qu’aquelas cargas èran ja prescrichas.
 
Mubarak, que governèt Egipte pendent trenta ans, es condemnat après lo jutjament d’un tribunal especial qu’a durat dètz meses. A 84 ans, Mubarak es lo primièr dirigent jutjat dempuèi que comencèt la Prima Aràbia al començament de 2011.
 
S’es decidit que Mubarak siá menat a l’espital de la preson de Tura en plaça del centre medical del Caire ont es demorat los darrièrs jorns amb plen de luxes e de comoditats, segon qualques mèdias.
 
Lo jutge a acabat la lectura del verdicte en disent que las senténcias èran prononciadas “sens cap de dobte” per metre fin a “trenta ans d’opression” jol regim de Mubarak. “Passam de tocar lo fons a devenir un far per la religion. Dieu a jonch los nòstres còrs per nos balhar de fòrças”, a dich lo jutge, qu’a considerat que la condemnacion se debanava après un jutjament just.