Pas jamai s’èra pogut passejar per la Via Lactèa coma se pòt far amb la gigafòto panoramica que ven de ne publicar la NASA. Mercés a dos milions de fotografias captadas pel telescòpi espacial Spitzer, pendent las darrièras dètz annadas, l’agéncia estatsunidenca a fach una fotografia interactiva fòrça detalhada, de vint gigapixèls, que nos permet de descobrir en 360 gras e de zooms, un pauc mai de la mitat de las estelas de la nòstra galaxia.
 
Dempuèi que se lancèt en 2003, lo telescòpi Spitzer a fach, pendent mai de quatre mila oras, de fotografias de la Vila Lactèa amb de lutz infraroja.
 
La mapa visuala s’es creada gràcias al projècte scientific collaboratiu Galactic Legacy Mid-Plane Survey Extraordinaire (GLIMPSE), desvolopat per la NASA, que sa tòca es de catalogar, amb l’ajuda dels internautas, d’airals d’interès dins l’espaci coma de bofigas e de cumuls interestellars e de galaxias.