Actualitats
L’ultradrecha s’impausa a las eleccions municipalas de l’estat francés
Lo partit xenofòb es la primièra fòrça a Besièrs, Bèucaire, Sant Geli, Bolena, Carpentràs, Aurenja, Dinha e Frejús, Tarascon e Brinhòla
Una taxa bassa de participacion e una mobilizacion fòrta de l’ultradrecha an donat de resultats istorics al Front Nacional (FN) al primièr torn de las eleccions municipalas de l’estat francés, que se debanèron ièr. Lo partit xenofòb es la primièra fòrça a Besièrs e Avinhon e mai Bèucaire, Sant Geli, Bolena, Carpentràs, Aurenja, Dinha, Frejús, Tarascon e Brinhòla. “Sèm una granda fòrça nacionala. Arribar primièrs dins tantas vilas es la pròva que sèm venguts per i demorar”, çò diguèt la cap de l’FN, Marine Le Pen, que se felicitava de la crescuda excepcionala de son partit.
Lo Partit Socialista auriá davalat a causa del marrit imatge de François Hollande e auriá quitament perdut de vilas emblematicas coma Pau. A Bordèu, l’èx-primièr ministre Alan Juppé es estat reelegit largament, coma èra previst, mentre que lo socialista Alain Rodet s’esfondra a Lemòtges. A Tolosa lo candidat de l’UMP, Jean-Luc Moudenc, despassa lo socialista Pierre Cohen, del temps qu’a Marselha, lo cònsol UMP Jean-Claude Gaudin despassa de 20 ponches son rival socialista. Per rapòrt a las listas occitanistas de Bastir, aurem los resultats aqueste ser e los publicarem dins l’edicion de deman.
Fàcia al segond torn, que se debanarà dimenge que ven, l’UMP a ja assegurat que demandarà pas de votar pels candidats socialistas s’afrontan l’FN e se i a pas cap de candidat conservator.
_____
Resultats del primièr torn
Le Figaro: Municipales 2014 : ces villes où le FN arrive en tête.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Lo sens prigon e basic del vòte FN es causir per menar sa vila de personas amb un progama racista o xnofòb (coma volais)! Que lo partit avança pas amagat! E son ben de personas domorant dins las vilas occitanas citadas qu'an fach aquela opcion, non? Degun a portat l'envolopa dins l'urna per eles. Lo vòte es un acte de responsabilitat qu'es dins la man qu'a plegat lo buletin. Per ièu existís pas una rason valable per discriminar un populacion dins son ensems e viure dins una vila menada per aqueles politica ne pòdi pas, ne me senti forabendit e l'onestat per ièu es de me n'exclure . Soi plan triste constatar que lo País del paratge e de la convivéncia se jamai existiguèt es vengut un mite!
Fa mestièr una interpretacion esclairada e credibla del vòte FN en Occitània. Es que se pòt far en Occitan o es que tota interpretacion d'aquel fenomèn dins la lenga es fòrçadament passionada e orientada ?
Un còp de mai, dins aquesta discussion coma dins d'autras, son leis antinacionalistas primaris que se compòrtan amb agressivitat.
#11
Francament quand vesi las resultas d'aquesta eleccion, soi fièr d'èsser pas francés....
#7 Totalament d'acòrdi. L'occitanisme es malurosament presonièr de sa mitologia, en granda incompreneson de son pòble e de sa realitat sociala.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari