La companhiá aeriana Malaysia Airlines a comunicat a las familhas dels passatgièrs de l’avion que desapareguèt lo 8 de març passat que la nau casèt e que totes los que i viatjavan son mòrts. En un messatge per telefòn mobil, la companhiá lor avancèt çò que lo primièr ministre de Malàisia comuniquèt ièr de ser, çò es, que l’avion tombèt al sud de l’Ocean Indian, segon çò qu’indican totas las pròvas.
 
Ièr de matin, un avion chinés que participava a las recèrcas de l’avion desaparegut vegèt dos objèctes, grands e blancs, que flotavan al sud de l’Ocean Indian. Aqueles objèctes son dins la meteissa zòna ont abans ièr de satellits franceses e chineses detectèron de presumidas rèstas flotantas d’aquel avion. Aquelas rèstas, que s’èran destoscadas amb de radars, se vegèron ièr per lo primièr còp a uèlhs nuds. Qualques oras puèi, un avion australian vegèt dos objèctes de mai, un de redond, verd o gris, e un autre rectangular de color irange.
 
Cap d’aqueles objèctes s’es pas pogut restacar fermament amb l’avion desaparegut, que i viatjavan 239 passatgièrs, mas s’espèra que dins las oras venentas, divèrses vaissèls arribaràn sus plaça per poder avalorar dirèctament las descobèrtas.