De sostens significatius als candidats d’obediéncia non francesa en Corsega, al Bascoat e en Nòva Caledònia. La drecha avança notablament en Occitània, l’esquèrra resistís mai en Bretanha. Lo Front Nacoional en cap a Perpinhan.

La Republica Francesa celebrèt dimenge lo primièr torn de las eleccions municipalas. Totes los resultats del vòte son disponibles aicí. Dins aqueste article, Nationalia a fach un zoom, forçadament incomplet, sus sièis territòris: Occitània, Bretanha, Corsega, Catalonha, lo Bascoat e la Nòva Caledònia. Las candidaturas d’obediéncia non francesa an atench de sostens significatius en Corsega, al Bascoat e en Nòva Caledònia.
 
Lo segond torn dels comicis se celèbra dimenge que ven, 30 de març. Al segond torn pòdon concórrer aquelas listas que superèron dimenge passat lo 10% dels vòtes. Una lista qu’atenguèsse lo 50% dels vòtes es declarada ganhanta dirèctament, e deu pas concórrer al segond torn.
 
 
Occitània
 
Una partida importanta de las vilas occitanas an virat cap a la drecha, siá ja per l’ascension de l’UMP o per la del Front Nacional, qu’a obtengut de resultats mai que mai bons en un fum de localitats del sud de Provença. A Marselha e a Niça, Jean-Claude Gaudin e Christian Estrosi (UMP) an un enòrme avantatge que los plaça en bona posicion per èsser elegits dimenge 30. A Bordèu, Alain Juppé (UMP) serà tornarmai lo cònsol. Mai dobèrta es l’eleccion a Tolosa, ont lo cònsol Pierre Cohen (PS) es estat superat de sièis ponches per l’opausant Jean-Luc Moudenc (UMP) mas manten d’opcions de gardar la comuna. Tant Cohen coma Moudenc preveson divèrsas mesuras en favor de la promocion de l’occitan dins lors programas.
 
 
Bretanha
 
Globalament, Bretanha es un dels territòris ont lo Partit Socialista manten mai las posicions davant l’ascension de la drecha. Pasmens, pèrd tanben de terren. En tot cas, los socialistas son en bona posicion per servar de vilas coma Brèst o Roazhon. D’un autre costat, lo cònsol de Karaez e cap dels bonets roges, Christian Troadec, sortís refortit de las eleccions: a atench la reeleccion dins lo primièr torn amb lo 65% dels vòtes. Troadec dirigís un partit autonomista breton, lo Movement Bretanha Progrès (MBP). De son costat, lo Partit Breton es plan plaçat per aténher una representacion dins divèrsas municipalitats.
 
 
Corsega
 
Dins la vila de Bastia, lo candidat del nacionalisme còrs Gilles Simeoni a egalizat amb Jean Zuccarelli, candidat de la coalicion de radicals e de comunistas franceses (un 32% cadun). Los dos se jogaràn la comuna (a l’ora d’ara en mans dels radicals) al segond torn. Los independentistas de Corsica Libera an fach un 5%. A Aiacciu, la drecha e l’esquèrra d’obediéncia francesa se disputaràn la victòria, del temps que lo candidat del nacionalisme còrs Joseph Filippi a atench près de l’11% dels vòtes e participarà tanben al segond torn. A Portivechju, i a bonas expectativas de trionf dimenge 30 per Georges Mela (UMP, cònsol sortent), que faguèt 49,5% dels vòtes. Aurà davant el lo candidat del nacionalisme còrs, Jean-Christophe Angelini (42,7%).
 
 
Bascoat Nòrd
 
Al Bascoat Nòrd, lo primièr torn daissa un panorama fòrça egalizat entre socialistas e conservators dins las principalas vilas. Al delà d’aquò, las listas del nacionalisme basco avançan de posicions per rapòrt a 2008 en divèrsas localitats, coma Ziburu, Sant Joan de Lus e Hendaia. E a Baigòrri, lo candidat qu’aviá lo sosten dels basquistas, Jean-Michel Coscarat, a atengut l’eleccion per majoritat absoluda al primièr torn.
 
 
Catalonha Nòrd
 
Dins la capitala nòrd-catalana, Perpinhan, lo candidat del Front Nacional, Louis Aliot, a atench la victòria (34%) al primièr torn, en despassant per quatre ponches lo cònsol e candidat de l’UMP, Jean-Marc Pujol (30%), qu’aviá lo sosten d’Unitat Catalana. Pujol ensajarà d’aténher lo sosten dels votants de l’esquèrra al segond torn per evitar qu’Aliot venga cònsol. Mentretant, lo cap de Convergéncia Democratica (CDC) a Perpinhan, Philippe Simon, se presentava amb la candidatura centrista Joves Engatjats, qu’a atengut un pauc mens del 3% dels vòtes.
 
 
Nòva Caledònia
 
Divèrsas listas independentistas neocaledonianas (a l’entorn de l’FLNKS) an atench la victòria per majoritat absoluda e, doncas, i aurà de cònsols d’aquela tendéncia dins mantas localitats d’aquel territòri oceanic de la Republica Francesa. Mas dins la capitala, Nouméa, seràn tres candidats unionistas franceses que se disputaràn la municipalitat, e los independentistas demòran sens representacion al consistòri. Los independentistas, per contra, progrèssan en d’autras localitats, coma Bourail o Koumac, e mai s’an plan paucas possibilitats de ganhar.
 
 
 
 
Aqueste article es adaptat de Nationalia, amb qui Jornalet a un acòrdi de cooperacion.