La primièra reünion entre lo president rus, Vladimir Putin, e lo sieu omològ francés, François Hollande, se debanèt divendres passat. Siria foguèt lo centre de la discussion.

Dins la conferéncia de premsa que se debanèt après l’amassada, los dos caps contèron que son d’acòrdi sus una sortida politica de la crisi, un objectiu que s’atenherà, segon lo president francés, en seguissent lo camin marcat pel plan de patz de Kofi Annan, enviat especial de l’ONU.
 
Dins aquel sens, Putin a dich que seriá “contraproductiu de dire que lo plan d’Annan s’es mancat”. Los dos presidents son tanplan d’acòrdi qu’una guèrra civila en Siria supausariá un perilh de destabilizacion de la region.
 
Per contra Hollande diguèt clarament que França exigís que Bashshar Al Asad quite lo poder, del temps que Moscòu sosten pas aquela opcion.
 
En remembrant lo masèl d’Al Haula (Houla), ont moriguèron un centenat de civils, Putin a dich que las guerrilhas de l’oposicion “an tuat un nombre similar de personas”.
 
La conferéncia de premsa serviguèt al president rus per demandar de gatges a l’OTAN quant al bloquièr antimissil. Putin a assegurat que lo dialòg amb l’Aliança Atlantica serà pas amical fins que quitaràn d’afirmar que “las basas militaras que creisson coma de camparòls a l’entorn de Russia” son pas un perilh per Moscòu.


Al Assad parla d'un complòt estrangièr