De milièrs de manifestants (4000 segon la polícia bèlga, 25 000 segon los organizaires) manifestèron ièr dimenge a Brussèlas amb los lèmas “Europe, we will vote!” (Euròpa, votarem) e “It’s about democracy!” (se tracta de democracia!). I aviá mai que mai de flamencs e de catalans, mas tanben de sud-tiroleses, d’escoceses, de bascos, e qualque bandièra occitana, e denoncièron davant las institucions de l’UE “las dificultats e las menaças per exercir la democracia e lo drech de votar en un referendum”.
 
“Recularem pas d’un sol pas, refusam tota oposicion, dificultat o menaça a l’exercici d’un drech fondamental universal coma lo drech a l’autodeterminacion”, çò avertiguèt Anna Arqué, pòrtavotz de la Comission Internacionala dels Ciutadans Europèus que cridava a la manfiestacion.