Cinc ans puèi, los èx-salariats de Molex, la filiala estatsunidenca d’esquipament automobil qu’èra a Vilamur de Tarn (Bas Carcin), an obtengut una indemnizacion a causa del barrament injustificat de l’usina e lo licenciement de totes los salariats. Lo Conselh dels prodòmes de Tolosa considerèt dijòus passat que la societat barrèt en octòbre de 2009 “sens causa reala e seriosa”, e acordèt d’indemnizacions de 90 000 èuros per planhent.
 
190 dels 283 salariats de Molex licenciats, comencèron tre lor licenciament una lucha per contestar lo barrament del sit carcinòl, en estimant que l’usina èra viabla, e la justícia lor a donat rason. La decision judiciària se considerèt coma un simbòl pels obrièrs, ja que non solament se jutgèt l’administracion francesa de la societat mas tanben l’entrepresa maire, plaçada en Illinois (Estats Units).
 
L’avocat dels salariats, Jean-Marc Denjean, diguèt que Molex decidiguèt de barrar lo sit en Occitània per abaissar los còstes de produccion e aumentar los beneficis dels accionaris. “Una transnacionala pòt pas licenciar de salariats en França amb lo pretèxt que sa filiala lai es pas rendabla, sens prene en compte la situacion globala de tot lo grop”, çò apondèt.
 
Un pòrtavotz del grop diguèt a Libération que “Molex Inc. considèra fòrça seriosament de far apelacion”. Lo grop “contèsta d’aver agit en qualitat de coemplegaire e a ja format un recors davant la cort de cassacion, soslevant l’incompeténcia de las jurisdiccions francesas sus aquel ponch”, çò expliquèt. De fach, Molex pensa qu’“es una sancion sevèra”.
 
Molex es una societat transnacionala presenta suls cinc continents e qu’emplega aperaquí 27 000 personas. En 2006 encaissèt mai de 2860 miliards de dolars.