Lo president francés, François Hollande, a demanat a Manuel Valls que siá lo nòu primièr ministre en substitucion de Jean-Marc Ayrault, qu’a demissionat amb tot lo govèrn coma reaccion a la desfacha electorala del Partit Socialista a las municipalas. Hollande a anonciat lo nòu “govèrn de combat” dirigit per Valls. Manuel Valls, nascut a Barcelona, èra ministre de l’interior de l’actual govèrn e es membre de l’ala pus centrista o liberala del Partit Socialista Francés. En un discors emés per television, Hollande s’es adreiçat als ciutadans: “En votant o amb l’abstencion, avètz exprimit vòstre malcontentament e vòstra decepcion. Ai ausit lo messatge”, çò a dich lo president de la Republica Francesa. Hollande a indicat que lo nòu executiu de Valls serà “un govèrn de combat” amb l’objectiu de refortir l’economia, de protegir la justícia sociala e de recuperar lo poder de crompa dels franceses. 

Hollande a volgut exprimir sa “reconeissença” al govèrn del demissionat Jean-Marc Ayrault, en disent d’aquel qu’a trabalhat amb “coratge e abnegacion” per recuperar l’economia. Pr’aquò, lo president francés a afirmat qu’a ausit lo messatge dels electors, qu’aqueste 31 de març an votat majoritàriament per la drecha.

Segon Hollande, los franceses an alertat que i a “tròp d’impòstes, tròp de caumatge”. Lo president a avisat qu’ignòra pas “lo patiment” dels que i pòdon pas arribar a la fin del mes. Lo president francés a apondut que “redreiçar lo país es indispensable” e que per aquò ten una nòva escomesa politica. “Fisi a Manuel Valls la mission de dirigir lo govèrn de França” amb una “còla unida, coerenta e coesionada”, çò a dich. “Es un govèrn de combat”, çò a remarcat Hollande.

Lo lidèr socialista a avisat que “França patís una division” e a recordat que la Republica es un “ben comun”. Per Hollande i a una “crisi civica e quitament morala” e òm es a far un “desfís” a las institucions. “Lo dialòg e lo respècte son mai que jamai lo melhor metòde per unir los franceses e lors representants”, çò a soslinhat. D’unes que i a aprofièchan la crisi per atissar “l’òdi e l’exclusion”, s’es lamentat Hollande en referéncia al Front Nacional.
 
Los socialistas an perdut a las municipalas mai de 150 comunas en de vilas de mai de 9 000 abitants, mentre que l’extrèma drecha del Front Nacional s’es afirmada amb lo contraròtle d’11 municipis.

Manuel Valls es un dels politicians del govèrn socialista amb mai de sosten entre los votants de drecha, subretot perque, en carga de l’interior, a aplicat una politica pus dura amb l’immigracion. Malgrat aquel discors e la polemica dobèrta per la decision de deportar la dròlla kosovara Leonarda, Valls a alertat en divèrsas ocasions dels “perilhs” de l’avanç electoral del Front Nacional de Le Pen. 
 
Valls representa l’ala pus liberala e centrista del Partit Socialista francés, e son perfil correspond amb un assag d’Hollande de crear un govèrn socialista, totun, pus pròche de las demandas qu’an fach los ciutadans a las municipalas, ont s’es votat majoritàriament per la drecha e, de faiçon creissenta, per l’extrèma drecha.
 



_____
Editorial de Vicent Partal dins VilaWeb: No ens convé Valls [Nos conven pas Valls]
Vidèo de VilaWeb: Valls s’atreveix a parlar en català? [Valls gausa parlar en catalan?]