Lo fotbolaire de l’esquipa ucraïnesa de Dnipro, Jaba Kankava, salvèt la vida d’un jogaire de l’esquipa opausanta, Oleg Gusev, del Dynamo de Kyiiv, qu’aviá tombat al sòl e èra demorat inconscient en seguida d’un còp amb lo portièr. Kankava reagiguèt amb rapiditat, li dobriguèt la boca e evitèt que s’estofèsse amb sa lenga pròpria abans l’arribada dels mètges de l’esquipa. Gusev se reanimèt, amb de movements brusques de cambas e en tossissent. Los servicis sanitaris lo prenguèron puèi, quand ja aviá recuperat la consciéncia.