La justícia espanhòla condemnèt ièr lo cantaire d’hip-hop catalan Pablo Hasél a dos ans de preson, per “exaltar lo terrorisme” mejançant las paraulas de sas cançons.
 
Hasél foguèt jutjat lo 10 de març passat a l’Audiéncia Nacionala espanhòla, un tribunal d’excepcion que tòca sustot los delictes restacats amb lo terrorisme. Aquel tribunal lo condemnèt a dos ans de preson. Los jutges soslinhèron que la principala pròva que l’acusava èra la declaracion del musician, pr’amor que reconeguèt qu’el es l’autor de sas cançons e se defendèt en disent qu’el simplament “executèt sa libertat d’expression e de creacion coma artista”.
 
Segon la senténcia, que validèt la tèsi del ministèri public, las paraulas de las cançons d’Hasél “vantan las accions e los membres” dels grops armats coma lo GRAPO, ÈTA o Terra Lliure, e de mai “ne justifica[n] l’existéncia”. Considèra tanben que lo musician demanda lo retorn d’aqueles grops e presenta lors membres coma de victimas de la democracia.
 
A la sortida del jutjament del 10 de març, Hasél se mostrèt ja convencut que l’Audiéncia Nacionala lo condemnariá a dos ans de preson. Admetèt èsser l’autor de las cançons, defendèt “la libertat d’expression” e considerèt que “degun” deviá pas impausar qui cal “respectar”. “Mas idèas son mas idèas. Soi comunista. Ieu ai parlat de lucha armada coma o faguèron Che Guevara e Marx e pr’aquò enebisson pas lors libres”, çò soslinhèt. De mai, considèra qu’una “partida de l’acusacion es falsa”, perque l’acusan de defendre Al Qaida, un movement que sosten pas, “perque es una organizacion anticomunista e qu’assassina fòrça innocents”, çò ditz.
 
Quand comencèt lo procès, lo quite Hasél expliquèt son cas dins un vidèo e denonciava lo secutament policièr qu’experimentèt pendent las doas annadas e mièja que foguèt en libertat amb de cargas, en esperant lo jutjament.