Lo govèrn de Catalonha a mandat un document a las ambaissadas que los 28 sòcis de l’Union Europèa an a Madrid, per lor explicar las diferéncias entre lo referendum de Crimèa e lo procès que viu Catalonha. Segon lo conselhièr de la presidéncia, Francesc Homs, s’agís d’una practica “regulara” per informar la comunautat internacionala. De mai, Homs soslinhèt que lo ministre espanhòl dels afars estrangièrs, José Manuel García-Margallo, comparèt los cases de Crimèa e de Catalonha, e mai se “se semblan coma un uòu e una castanha”.
 
Lo document es entitolat “Catalonha es pas Crimèa”, e pòrta la data del 26 de març, dètz jorns après lo referendum en Crimèa que ganhèron los partisans de l’annexion a Russia. Lo tèxt defend qu’aquel vòte, a la diferéncia del cas catalan, foguèt condicionat per un poder d’invasion, amb d’armadas per carrièras e amb un govèrn qu’es arribat a la presidéncia mejançant la fòrça.
 
De mai, segon lo document, “aqueles que restacan” los dos scenaris “confondon deliberadament la situacion reala per crear la confusion”.