Un tribunal de Bordèu condemnèt dimècres passat un òme a 3000 èuros de multa, dont 1500 amb ajornament, perque aquel òme aviá publicat de fòtos sus son Facebook en fasent lo gèst antisemita nomenat “quenelle” davant la sinagòga de la ciutat gascona. Jutjat per “provocacion publica a la discriminacion e a l’asirança raciala”, l’an tanben condemnat a pagar 1500 èuros de damatges e interèsses a la Liga Internacionala contra lo Racisme e l’Antisemitisme (LICRA), la partida civila del procès.
 
Lo condemnat es un trabalhador dins lo bastiment nascut en Marròc, que l’interpelèron lo 17 de genièr en seguida d’una denóncia de l’Associacion Culturala Israelita de Gironda, a la quala s’apondèt la LICRA. L’òme aviá publicat divèrsas fòtos sul ret social entre lo 28 de decembre e lo 7 de genièr passats. Dins aquelas fòtos se lo podiá veire en fasent lo gèst polemic nomenat “quenelle”, una d’elas davant un retrach d’Adolf Hitler amb la legenda: “Soi estat con de me suicidar, uèi seriái lo Prèmi Nobel de la Patz”. Aquel darrièr imatge es lo sol qualificat penalament.
 
Lo condemant se defendèt de tot antisemitisme. “N’èi pas arren contra los josieus. Sus lo men Facebook, que hèi atencion a non har pas l’amalgama entre antisionista e antisemita”, çò afirmèt. “Non èra pas la mea tòca de herir lo pòble josieu”. A prepaus de la fòto davant lo retrach d’Hitler, diguèt que s’agissiá d’una “fòto ironica”, e mai se l’avocata e presidenta de la LICRA, Clothilde Chapuis, considerèt “que i a ben intencion d’insultar las victimas deu genocidi”.
 
La “quenelle” es un gèst promogut per l’umorista francocameronés Dieudonné M’Bala M’Bala, es considerat coma una simulacion de la saludacion nazi per qualques unes, e coma un simple gèst iconoclasta per d’autres. Es estat totjorn acompanhat d’una fòrta polemica; coma la provocacion antisemita davant l’escòla josieva Ohr Torah de Tolosa, que Jornalet raportava a la fin de decembre e que la justícia mondina a aviat una enquèsta dessús; o ben coma qualques fòtos publicadas sul sit de l’umorista e fachas en Orador de Glana, lo vilatge occitan massacrat pels nazis.
 
Sus Le Figaro, la procuraira remarca qu’“en drech, lo gèst de la «quenelle» es pas incriminat coma tal. Es perque s’intègra dins un contèxt que pòt èsser considerat (…) coma provocacion a l’asirança raciala”. La procuraira rapelava tanben que lo prevengut a refusat de donar lo nom de la persona que pausa amb el davant la sinagòga de Bordèu. Es ela que requeriguèt 3000 èuros de multa.
 
De son costat, la LICRA se ditz “un pauc decebuda” de la cleméncia del jutjament, mas totun satisfacha tant que “la «quenelle» es estada considerada un gèst antisemita e una provocacion a l’asirança raciala”.