Lo candidat dels Verds europèus a la presidéncia de la Comission Europèa, l’occitan José Bové, assegura que lo govèrn espanhòl se poirà pas opausar al resultat d’una consulta en Catalonha “se se fa de biais transparent e amb d’observadors per verificar qu’es democratica”. Dins una entrevista a l’ACN, l’altermondialista e lidèr païsan occitan vei pas cap de rason per expulsar una Catalonha independenta de l’Union Europèa e trobariá legitim qu’i demorèsse. “Per ieu, i a pas cap d’ambigüitat: Catalonha fa ja partida de l’Union Europèa, e se deman lo pòble catalan decidís  per referendum que vòl venir independent, i a pas cap de rason per la daissar a despart”, çò assegura lo cap de lista dels ecologistas europèus a las eleccions del 25 de mai.
 
Los Verds europèus fan un pas de mai dins lor sosten al procès sobeiranista: après que la tanben candidata ecologista a la succession de José Manuel Durão Barroso, l’alemanda Ska Keller, a sostengut la consulta, Bové va mai luènh e defend la conformitat d’un estat catalan amb l’Union. “Cresi que seriá legitim que Catalonha demorèsse dins l’Union, e tanben Escòcia e d’autres païses, regions e pòbles”, çò pensa l’eurodeputat. Bové denóncia que “la logica dels estats-nacions es a destruire Euròpa” e desira que se crèe “una ciutadaniá europèa delà los estats per poder construire una democracia al nivèl dels ciutadans”.
 
“A partir del moment que los catalans an decidit d’organizar aqueste referendum, se se fa de biais transparent e amb d’observadors per verificar qu’es democratic, vesi pas cossí Madrid se poiriá opausar al resultat”, çò ditz amb fisança Bové. “Seriá completament contrari al drech dels pòbles de decidir lor pròpri avenir”, çò insistís. Bové, totun, demanda a Catalonha que prenga pas son independéncia “contra los autres pòbles d’Espanha mas, al contrari, per refortir l’idèa democratica que cada pòble, mentretant qu’es sobeiran e ten sa pròpria cultura, se dobrís als autres.”
 
Bové es cap de lista amb Keller que, dins una vesita a Barcelona lo 10 de març, manifestèt son engatjament personal per la consulta e demandèt al govèrn espanhòl que dobriguèsse “un procès de dialòg”. “Los Verds europèus defendèm la radicalitat democratica e en Catalonha i a una demanda dels ciutadans en favor d’un referendum”, çò admetèt l’eurodeputada alemanda. Bové e Keller son los candidats d’ICV (ecosocialistas catalans) a la presidéncia de l’executiu comunautari. Cal ajustar tanben qu’ÈRC (republicans catalans) parteja un grop parlamentari amb los Verds europèus a Brussèlas.
 
Combatre l’abstencion e l’ultradrecha es lo desfís màger dels Verds europèus aquel 25 de mai. Bové avertís que votar pels partits que reclaman a Brussèlas que torne las competéncias als estats membres es una error perque “a luòga de resòlver los probèmas actuals los pòt agravar”. Bové repròcha a la Comission Europèa d’aver gerida la crisi coma un “organisme tecnocrata” e de trabalhar en marge del Parlament Europèu.