Dins lei Mauras, un còp arribada la prima, se debanan lei passacarrieras florits (o còrsos florits). Chasca associacion —avans èra quasi chasca familha— bastisse de personatges e una armadura de fèrre sus un carri que se li mete de flors subre en decoracion segon un tèma definit chasque an. Lei decoracions fachas de flors naturalas, de teissut o mai de papier rivalizan d’ingèni per se far remarcar per carrieras. Lo succès d’un carri es avalorat au picament dei mans.
 
En abriu doncas, dau passacarriera florit famós de Bòrma amb la mimòsa fins a Santa Maxima, en passar per de mens conoissuts coma Cavalaira, lei còrsos tòrnan. Es la fèsta dau revelh de la vida, de la natura e lei carris enflorits passan animar lei carrieras principalas de sa comuna. Aquela fèsta populara e intergeneracionala s’arrestèt pauc d’annadas fa dins la vila mai granda d’Ieras —per de rasons de seguretat, dién—. Mai dins lei comunas mai pichonas, demòra coma un moment de gaug tot en cercar de s’actualizar. S’acaba per la batalha de flors, que chascun pòu rabalhar a gratis un sovenir florit de la fèsta.
 
Aquest an per exemple lo còrso florit cogolinenc es sus lo tèma de l’emission TV francesa deis annadas 1970: Bòna nuech lei pichons (Bonne nuit les petits).
 
 
 
 
Clorinda Viòu