Dimenge passat, France Info publicava un papièr sus las recèrcas del jornalista Michel Bessaguet per rapòrt a l’emplec excessiu e nociu dels pesticidas dins las vinhas, que ne publiquèt un article sus la revista XII. E curiosament diluns, Le Figaro raportava la nòva estonanta del vinhairon biologic francés, condemnat per aver pas tractat quimicament sas vinhas.
 
Bessaguet comencèt sas recèrcas dins las vinhas de Bordalés, après la lectura d’un article dins un jornal local en febrièr d’arunan que lo faguèt soscar. Descobriguèt que l’estat francés a lo recòrd de consume de pesticidas, amb 62 700 tonas utilizadas cada annada dont lo 20% es per la viticultura. Al delà, aquela chifra es en aumentacion constanta.
 
Lo jornalista relia l’emplec massís dels pesticidas amb las malautiás professionalas. Explica lo cas d’un vinhairon mòrt dins sos 47 ans per un càncer après aver manipulat de pesticidas dempuèi l’edat de 14 ans. Çò de mai estonant, es que quand lo jornalista cèrca de testimònis, lo subjècte es “tabó, amagat, dissimulat, enfumat per las institucions agricòlas”, çò ditz.
 
Dins aquel article, doncas, lo jornalista met en causa lo pes del lobby agricòla e denóncia los ligams entre l’FNSEA, federacion de sindicats agricòlas, e l’Union de las Indústrias per la Proteccion de las Plantas (UIPP). Segon el, se se fa pas res rapidament, cal crénher una catastròfa sanitària màger, coma per l’amiant.