An publicat un disc per festejar l’amistat occitanocatalana. Dins l’album, entitolat Catalunya-Occitània songs, onze grops occitans e onze grops catalans an enregistrat de cançons dins lors lengas respectivas, amb la tòca de “simbolizar los ligams fòrts qu’unisson aqueles dos pòbles vesins dont las lengas bessonas contunhan de viure dins la pluma e los cants de lors artistas, sens interrupcion dempuèi los trobadors”. Lo disc compren de musicas electricas, rock o reggae.
 
L’album l’a publicat l’associacion dels Angelets de la Terra, una associacion que trabalha per defendre e promòure la lenga e la cultura catalanas en Catalonha Nòrd. Aquela associacion lancèt un collectiu de qualques centenats de musicians a Perpinhan, e ara son director, Ramon Faura, es installat en Peiregòrd, e a coordenat aqueste projècte nòu: “l’occitan en Peiregòrd deu pas èsser unicament folclòre e tradicionalisme, senon despareisserà amb la nòstra generacion”. Es per aquò qu’a apelat Joan-Pau Verdier, Pèiraguda, Igor, Sono Loco e La Torna per enregistrar aqueste album, que i an tanben trabalhat de grops mai recents coma Talabast, Almacita, Les Bizbilles, Terre d’Avril et Les Batteurs Rient.
 
Per la seguida, Ramon Faura compta d’organizar de concèrts ont totes aqueles musicians, e los de la partida catalana, se poiràn rescontrar e cooperar. La tòca es de metre la lutz sus la qualitat d’aqueles grops e incitar los festenals d’Occitània e de Catalonha —pas necessàriament de militants lingüistics— a los programar. Faura remembra tanben a las institucions que poirián sosténer aqueste projècte qu’“aqueste territòri euroregional es fòrça vast amb 15 milions d’occitans e 11 milions de catalanofòns”.
 
Per mai d’informacion podètz contactar Ramon Faure al telefòn, al +33 (0)6 68 89 82 71, o per e-mail, a raymond.faura@...