Lo Partit Liberal de Quebèc (PLQ) a ganhat las eleccions de Quebèc per majoritat absoluda, amb setanta deputats (vint de mai qu’en las eleccions passadas) dels 125 deputats del parlament de Quebèc, l’Assemblada Nacionala. De son costat, lo partit de govèrn, lo Partit Quebequés (PQ), a obtengut solament trenta deputats (vint e quatre de mens dels qu’aviá fins ara). Aital, amb la frapanta e forçadament inesperada desfacha del PQ, s’es completament escartat un eventual referendum d’independéncia qu’òm aviá especulat. De fach, lo PQ aviá convocat las eleccions fa un mes, sonque dos ans après las aver ganhadas, amb l’intencion d’obténer una majoritat encara mai clara per poder convocar lo referendum. Amb tota probabilitat, lo cap del PLQ, Philippe Couillard, vendrà lo primièr ministre quebequés.
 
Lo partit nacionalista conservator Coalition Avenir Québec (CAQ) es passat de 19 a 22 deputats del temps que los independentistas d’esquèrra del Québec Solidaire (QS) an passat de dos a tres deputats. L’actuala primièra ministra, Pauline Marois, que faguèt istòria en 2012 en ganhar las eleccions precedentas e en venent la primièra femna cap de govèrn de Quebèc, a ja reconegut la desfacha e a anonciat sa demission coma cap del PQ. Marois faguèt tanplan una passionada defensa de la lenga francesa e a sollicitat la defensa d’aquela lenga dins l’America del Nòrd.
 
De son costat, Couillard, lo futur primièr ministre, diguèt que “Quebèc a de besonh d’una reconciliacion” après una dura campanha electorala e a soslinhat que se concentrarà sus “l’economia e l’emplec”, en metent en evidéncia que lo sieu govèrn a pas cap d’interès a consagrar de temps e d’esfòrces a l’ideal sobeiranista. Lo primièr ministre canadian, lo conservator Stephen Harper, diguèt dins un comunicat que “los resultats demòstran clarament que los quebequeses an refusat l’idèa d’un referendum” d’independéncia.