La consolessa d’Ais de Provença, Maryse Joissains-Masini, la justícia l’entendèt dimècres passat pendent nòu oras, per presa illegala d’interès e desviaments de fonzes publics. La consolessa, tot recentament reelegida, foguèt ja en gàrdia a vista en decembre passat, dins l’encastre d’una enquèsta sus d’emplecs fictius o de complasença.
 
La consolessa èra intrada al tribunal d’Ais a 15h e ne sortiguèt un pauc abans mièjanuèch, acompanhada de sos tres avocats. Joissains-Masini aviá una imputacion sus quatre foncionaris, e a la fin ne demòra una imputacion sus dos. “Aquò es un solatjament, e siáu persuadida que lei novèus elements que portarem entraïnaràn un non-luòc globau”, çò declarèt Joissains-Masini als jornalistas de France 3.
 
Segon ela, la justícia la perseguís per l’emplec a la Comunautat del País d’Ais d’una collaboradora de son gabinet, encargada d’una mission que concernís los animals, e la promocion de son menaire en categoria A, lo gra mai naut dins la foncion publica. Çò que se li es contestat, es que la Comunautat del País d’Ais a pas cap de competéncia suls animals, mas caduna de las comunas, e  que son menaire pòt pas passar a las primièras plaças de la categoria A en venent de la 46a posicion sus 160 dins una lista de foncionaris de la classa B.
 
“Es pas contestat qu’aquelas doas personas trabalhen, aquò son pas d’emplecs fictius. Ai aplicat la lei, purament e simplament”, çò diguèt la consolessa, que tanben precisèt que las cargas que la justícia a abandonat son las que concernisson l’estatut del director dels servicis de la Comunautat del País d’Ais e lo recrutament del filh de son menaire.
 
La convocacion d’aqueste dimècres passat èra fixada en genièr, mas foguèt reportada a la demanda de la consolessa e sos avocats.
 
Maryse Joissains-Masini a 71 ans. Es consolessa d’Ais de Provença dempuèi 2001 e foguèt reelegida al segond torn de las darrièras eleccions municipals amb 52,61% dels vòtes, dins una triangulara.