Un collectiu d’artistas paquistaneses an installat un vintenat de fòtos gigantas d’una drolleta que cèrca d’umanizar las victimas dels drònes, los avions de guèrra sens pilòt. L’installacion se nomena #notabugsplat (pas una bestiòla escrachada), en allusion al fach que los operators dels drònes estatsunidencs nomenan “bestiòlas” las victimas dels atacs d’aqueles avions.
 
“S’es mes de fòtos suls teulats de qualques ostals del nòrd de Waziristan, lo parçan mai afectat pels atacs dels drònes”, çò expliquèt Shahzad Akbar, un dels promotors de l’iniciativa, menada a tèrme per la Fondacion dels Dreches Fondamentals. La drolleta de la fòto perdèt sos parents e dos fraires pendent un atac amb de drònes.
 
Lo sit web del collectiu d’artistas descriu aquela installacion coma “un projècte que visa los pilòts dels drònes «predators», que son assetats a de milièrs de milas de distància e que parlan de lors victimas mortalas coma de «bug splats» [de bestiòlas escrachadas]”. “Per contra, ara veiràn la cara d’una dròlla”, çò explican sul sit web, que ditz tanben que l’iniciativa es d’un grop de paquistaneses amb lo sosten de collègas estatsunidencs e d’un artista francés conegut coma JR.
 
Aital, la tòca del projècte es de “crear d’empatia e d’introspeccion demièg los operators dels drònes e de generar de dialòg demest los politicians, e los menar benlèu a prene de decisions que salvaràn de vidas innocentas”.
 
Après mai de 10 ans, los atacs amb aqueles avions sens pilòt an tuat 3646 personas en 400 bombardaments, segon lo Burèu del Jornalisme de Recèrca, e demest eles, entre 416 e 951 èran de civils, segon aquela organizacion britanica de jornalistas. Ça que la, lo secretisme d’aquel tipe d’operacions empedís d’aver de donadas fisablas contrastadas.
 
Lo darrièr atac amb de drònes en Paquistan se passèt lo 25 de decembre passat.